Aizawla veng fai ber - Laipuitlang

Aizawl Municipal Corporation (AMC)-in Faina Hapta a kalpui chu nimin khan Chanmari YMA Hall-ah khar a ni a, Hapta puala faina lama ti ṭhate hnenah lawmman hlan a ni. Aizawla veng fai berah Laipuitlang an thlang.

Aizawl mayor PC Lalhmingthanga chuan, Faina Hapta chu khâr ni mah se, kalpui zel tur a nih thu a sawi a; fai tura bul ṭanna chu rilruah a awm tih sawiin, "Puitlingah chuan inzirtir a har tawh a, naupang rilruah tuh a ngai hle. Zirlaiah a hrana a tel hial a ngai niin a lang," a ti.

PC Lalhmingthanga chuan, bawhhlawh tihfai nan AMC-in cheng nuai 438 a dah thu leh local council-te nen theihtawpa tan an lak thu a sawi a; faina kawnga hmalaknain awmzia a nei mawh mawh deuh em tih ngaihtuah theih a nih thu sawiin, Aizawl khawpui tifaitu tur chu Aizawl mite bawk an nih thu a sawi a ni.

AMC-in Faina Hapta puala veng fai leh zirna-in fai a thlannaah, sikul fai chu School Education department-in an endik a, veng fai chu Mizoram Journalist Association (MJA) general headquarters-in an endik thung. Fainaa ti ṭhate hnena lawmman hlan a nih bakah hian, khawpui dung phiattu sweeper ṭha zual panga hnenah chawimawina leh lawmman hlan a ni bawk.

Fai lawmman latute

Veng

1-na Laipuitlang

2-na Republic Vengthlang

3-na Zotlang

Primary School

1-na Sakawrtuichhun PS-I

2-na Ramhlun North Model P/S

3-na Durtlang PS-III

Middle School

1-na ITI Veng M/S

2-na Chaltlang M/S

3-na Mission Vengthlang M/S

H/S & HSS

1-na Bethlehem Vengthlang H/S

2-na Mizo HSS

3-na KVM H/S, Chhinga Veng