Faina Hapta khârnaah lawmman inhlan

Nimin khan district hrang hrangah kumin October 2-a hman ṭan, Faina Hapta khârna hun hman a ni a; Hapta puala inelna hrang hranga ti ṭhate hnenah lawmman hlan a ni.

Faina Hapta khârna inkhawm hi Lungleiah chuan Convention Centre-ah hman a ni a, MLA Joseph Lalhimpuia'n hmanpuiin, lawmmante a hlan. Extempore speech-a inelnaah LH Lalnunsiama, J Buana College pakhatna a ni a, slogan inziahsiakah Remmuana Chawngthu ziah 'Ram hmasawnna tluan­tling nei turin i fai ang u' tih chu ṭha berah thlan a ni.

Lungleia veng fai ber chu Sethlun a ni a, Zotlang leh Zohnuai-in an dawt. Lunglei pisa fai bera thlan chu PWD EE pisa a ni. Fai ber dangte chu - H/S chung lamah Theiriat High School, elementary school zirlai 50 hnuai lam nei zingah Darphawka Memorial M/s Theiriat, elementary school zirlai 50 aia tam neiah Rahsi Veng M/S-II a ni.

Champhaiah chuan Champhai Multipurpose Hall-ah Faina Hapta khar a ni a, DC Vanlalngaihsaka khuallian a ni. Inelnaa ti ṭhate hnenah lawmman hlan a ni a, pakhatnain Rs. 3,000, pahnihnain Rs. 2,000 leh pathumnain Rs. 1,000 an dawng. Champhai district-a faina lama ti ṭha zual sikul pakua hnenah Swacch Vidyalaya Puraskar lawmman hlan a ni bawk.

Champhai districty-a faina kawnga inelnaa ti ṭha berte chu - veng fai ber Hmunhmelṭha, office fai ber DIET, H/S leh HSS fai ber Vengsang High School, M/S fai ber Model Vengthlang M/S, P/S fai ber Bethel Veng P/S-VI leh anganwadi fai ber Venglai-I Anganwadi te a ni.

Kolasib-ah chuan Diakkawn YMA Hall-ah kharna hun hman niin, bialtu MLA PC Zoram Sangliana’n a hmanpui a, faina lama inelnaa ti ṭhate hnenah lawmman a hlan.

Kolasib-a faina lama inelnaa pakhatnate chu - middle school-ah TS Luaia Middle School, high school leh a chung lamah CZ HSS, essay writing-ah C Lalthlamuani, hotel/restaurant-ah Mizo Hotel Pui, home-ah Enna In, short film-ah Lalchhanhima & Party, khuaah Lungdai, office-ah PHE office leh vengah Khuangpuilam te an ni.

Serchhipah chuan DC Conference Hall-ah kharna inkhawm hman a ni a, district MJA president C Lalhminghlua'n kaihruai­in, additional DC Chuauhnuna khuallian a ni.

Serchhipa veng fai bera thlan chu Vengchung V/C-1 a ni a; Swachh Vidyalaya Puruskar 2016-a Green Category dawngtu sikul pahnih hnenah lawmman hlan a ni a, lawmman dawngtute chu Democratic High School leh Sialhau RMSA School-te an ni.

Lawngtlaiah chuan Faina Hapta kharna hun hi DC Conference Hall-ah hman a ni a, Lawngtlai CMO Dr Thani Pachuau-in kaihruaiin, sorkar official, V/C leh tlawmngai pawl aiawhte an tel. Khuallian, Lawngtlai DC Dr Arun T-in Faina Hapta hman chhunga office, zirna in, hotel/restaurant/thingpui dawr leh veng fai thlante hnenah lawmman a hlan.

Office fai berah District Medical Superintendent office thlan niin, Land Resources, Soil & Water Conservation office leh Deputy Conservator of Forest office-te chu pahnihna leh pathumna an ni. Zirna in fai ber chu Rev. Thanzinga Memorial M/S a ni a, Chandmary P/S-I leh Bethel M/S ten an dawt. Hotel fai ber chu Lairam Hotel-I a ni a, Ruthi Restaurant leh MB Restaurant ten an dawt a; veng fai ber chu Lawngtlai Vengpui niin, Bethel Veng leh Vengpui-II ten an dawt a ni.

Mamitah chuan Chhimveng YMA Hall-ah kharna hun hman a ni a, additional DC H Lianzela'n a hmanpui. Swachh Vidyalaya Puraskar Award dawngtu Rawpuichhip High School leh Dapchhuah Middle School-te hnenah award hlan a nih bakah, faina inelnaa ti ṭhate hnenah lawmman hlan a ni.

Mamita faina lama inelnaa ti ṭha berte chu - veng ber Chhimveng, sikul fai ber Charkawn M/S-I, hotel/restaurant fai ber RK Restaurant, Charkawn-te a ni.