'Vai buhfai ei ṭheuh ṭheuh' tih hla Sak ṭhin hi tihtawp kan tum - Zorama

MNF president Zoramthanga chuan nimin khan Mizo Hnam Rûna inkhawmah thu sawiin, MNF-in sorkarna an siam chuan Mizo nationalism-a innghat economic system kalpui a nih tur thu a sawi a, "Vai buhfai ei ṭheuh ṭheuh tih hla sak ṭhin hi tihtawp kan tum," a ti.

Zoramthanga chuan, "Kan ram leilunga hman ṭangkai theih hmanrua tam tak kan neihte hmanga chhungkaw tin intodelhna tur siam turin kan sorkar tûka kan rîk phatna tur SEDP hnuaiah hmalakna tur duan sa kan nei vek tawh a ni," a ti a; Mizoram lei chung hausakna hmangin Mizoram chu chawa intodelhtir ngei tura hma an lak dawn thu a sawi.

Mizoramah sq.km. 30,000 chuang ram ṭha, sik leh sa leh ruah­tui duhthusama ṭha a awm tih sawiin Zorama chuan, "Ram rálmuang, sakhaw khat bia leh Thlarau Thianghlimin harhna a pek zin ram kan ni chungin kan rethei tlat reng a. MNF-in sor­karna kan siam chuan SEDP hmangin Mizoram thar chhuah economic-a innghat turin hma kan la tak tak dawn a, chaw­a intodelh kan ngai pawimawh ber dawn a ni," a ti.

MNF President chuan, Mizoram mipui zingah mi hnuaia inhlawhfa tura rilru pu an tam tawh nia sawiin, hlawhfa rilru ringawt pu tawh loa hlawhfa chhawrtu zawk ni thei turin Mizoram mipui siam an tum tih a sawi a; Mizoram economy pui ber thununtu tur chu Mizorama thar chhuah ngei a ni tur a ni tih a sawi bawk.

Nimina Mizo Hnam Runa inkhawmah hian college zirlai 20 leh Tuikual North-a Congress Mahilla Vice President-te chhungkua MNF-ah Zoramthanga'n a lawm lut niin MNF thuchhuah chuan a tarlang.