Hnam Chhantu Pawl Autumn Fair hawng

Hnam Chhantu Pawl chuan nimin aṭang khan Assembly Annexe building chhawng hnuaiah Autumn Fair 2017 an buatsaih a, IPR minister Lal Thanzara’n a hawng.

Lal Thanzara chuan, hnam ziarâng hrang hrang humhalh leh phochhuahna kawngah Hnam Chhantu Pawl-in an thawh hlâwk tih sawiin, "Thil siam dan hrang hrang mi dang an zirtir aṭangin ṭhalaite tan eizawnna kawng an siamsak a ni," a ti a; state dangin Mizo hnam an hriat theihna awlsam ber pakhat chu Mizo siam ngei thilte a nih thu leh, chu'ngte chu Mizote pawhin an hlut thiam a pawimawh thu a sawi.

Fair-a tel, mahni kutchhuak pho langtute chu chhuanawm a tih thu sawiin Lal Thanzara chuan, mipui tan a hlut thu a sawi a, "Handloom hmanga thil siamte hi awlsam taka ram páwna thawn chhuah theih a ni. Mizoramah puan tahtu an pung nasa a, inelna pawh a sang tawh hle a, design nalh leh kutchhuak mám ṭha neih a pawimawh," a ti.

IPR Minister chuan, Mizo puantahte neitu dik tak an nih theihna atana pawimawh Geographical Identification (GI) neihna kawngah hmalak mek a nih thu a sawi a; NEDP hnuaiah handloom ngaih pawimawh a nih thu leh Thenzawlah Mizoram Handloom Research and Council din tum mek a nih thu a sawi bawk.

Hnam Chhantu Pawl hi March 3, 1994-ah Ramhmangaiha'n a din a ni a, an tum ber pakhat chu Mizo kutchhuak thil siamte tihlâr a, ram dangte'n an hmelhriat theih nana hmalak a ni. Autumn Fair 2017-ah hian stall eng emaw zat a awm a, Mizo siam chhuah thil chi hrang hrang pho chhuah a ni a; October 13 thleng neih a ni ang.