KHAWTHLIR

Naupang pahnih Tuiah an tla hlum
Nimin tlai dar 3 vel khan Falkland Venga KṬP-in Youth Recreation Centre (YRC) hmun tur an laiha tui tlingah naupang pahnih an tla hlum. Thu dawn danin, tuia naupang tla hlumte hi Hmangaihsanga (5 vel) s/o Rinawma leh David Vanlalchhuanga (6 vel) s/o Lalremliana, Falkland Veng ve ve an ni a; an ṭhiante nen tuiah hian chengin an chesual palh a, an tlak hnuah damdawi-in panpui an nih laiin an thi a ni.

Garage neih tur
Aizawla sorkar hnathawk, sorkar motor kawlte chu a dahna tur garage nei vek turin Transport department-in a hriattir. Thupek hi Traffic Management Coordination Committee ruahman anga December 1, 2017 aṭanga Traffic Jam Free Aizawl kalpuina tura hmalakna a ni a; sorkar hnathawk, sorkar motor kawl zinga an chenna bul hnaia a dahna tur nei lote chu an office garage-ah dah mai tura hriattir an ni. Motor chhia reng reng, sorkar ta a ni emaw, mimal ta a ni emaw, kal sawn thei lo kawng sira hnutchhiahte chu hnuh sawn zel a nih tur thu sorkar thuchhuah chuan a tarlang bawk.

RTI Week hmang
Mizoram Information Commission (MIC) leh Information & Public Relations department chuan nimin khan Champhai College multipurpose hall-ah Right to Information (RTI) Week 2017 an hmang. RTI Week hmanna inkhawm hi Champhai bawrhsap Vanlalngaihsaka'n a kaihruai a; Champhaia IPRO Dr Lallawmkima'n RTI ṭobul leh pawimawhna, a hman dan leh a tumte a sawi a, resourse person Lalthantluanga Tochhawng, GM Higher Secondary School-a lecturer-in RTI chungchanga mipui hriat pawimawh hrang hrangte a sawi.

Minister dem
PRISM chuan thuchhuah siamin, minister Lal Thanzara'n MNF local council hnenah MLA fund pek ba loa a inngaih thu a sawi niin an tarlang a; minister Lal Thanzara chu a thu sawi avangin ram hruaitu ni tlak ni loa an ngaih thu leh mipui rorelna palzûtna nia an ngaih thu sawiin, "MLA Local Area Development Fund hi mipui ta, mipui chanvo a ni a, induhsakna atana party mite hnena pek chu dan kalh a ni," an ti.