Kawng chhiat chhan chu sorkar Inthlahdah vang a ni - MNF

MNF party-a Vigilance department hotute chuan nimin khan Aizawl Press Club-ah thuthar thehdarhtute kâwmin, Mizorama kawng chhiat chhan chu Congress sorkar inthlahdah vangah an puh a; kawngpui siamna tur sum a awm reng laiin, Congress sorkarin kawngpui an siam duh lo niin an sawi.

Vigilance secretary TJ Lalnuntluanga chuan, Congress party-in Mizoramah kum 10 dáwn sorkarna an chelh chhungin kawng chhiat chhanah chhuanlam hrang hrang an dap nia sawiin, "Tawmngai pawl, khawtlang leh lirtheia eizawngtute'n kawng siam ṭhaa an hnatlan thu kan hre chàm chí a, kawng chhiat vangin mipui kan rûm mek. Hei hi Congress sorkar inthlahdah vang liau liau a ni," a ti.

MNF Vigilance Secretary sawi danin, Seling-Champhai kawng chu sorkar laipuiin March 4, 2014-ah National Highway no. 6-ah a puang a, a enkawl hna chu Ministry of Road transport and Highway (MoRTH)-in February 17, 2015-ah Mizoram PWD (Highways) kutah a hlan.

Chuti chungin Border Roads Organisation (BRO)-in Seling-Champhai kawng enkawl hna chu kum 2 chhung an thawk zui a; Mizoram sorkar chuan March 31, 2017-ah BRO kut aṭangin Mizoram PWD-in kawng enkawl hna a la fel chauh niin a insawi a ni.

TJ Lalnuntluanga chuan, Mizoram PWD-in BRO aṭangin Seling-Champhai kawng enkawl hna 31.3.2017-ah a lak chauh avangin Mizoram PWD-in hna an thawh theih loh thu an sawi laiin, Seling-Keifang leh Kawlkulh-Khawzawl kawng siam nan December 2, 2015, July 29, 2016 leh March 30, 2017-ahte kawng siamna turin tender chhuah a nih thu a sawi a, "An enkawl lo a nih chuan tender chhuah âwm loh tak a ni," a ti.

Mizoram PWD-in Seling-Champhai kawng enkawl hna a lak hmain kawng siamna tur sum Mizoram sorkarin a lo la lâwk a nih chuan, Mizoram PWD kuta hlan a nih tirh aṭangin inthlahdah loin hma la nghal ta se, tuna kawng chhe nasa lutuk chu a thlen loh tur thu an sawi.

MNF Vigilance tarlan danin, Kawlkulh-Khawzawl km. 30 siamna turin MoRTH aṭangin November 20, 2015-ah sum sanction hmuh a ni. MoRTH sanction letter number chu 1595.71 NH-13012/42/2015 /MZ/P-8 Dt 23.11.2016 niin, sum sanction zat chu Rs. 13,92,15,224 a ni a, December 2, 2015 - January 6, 2016 chhunga chhan turin e-tender (technical bid) chhuah a ni.

July 29, 2016-ah Mizoram PWD Chief Engineer (Highways)-in e-tender (financial bid) a chhuah leh a, tender chu July 30, 2016 - August 29, 2016 zanlai thleng chhanna hun hawn a ni a; contractor atan Nidhi Creative Infrastructure thlan a ni.

Seling-Keifang km. 35 siamna atan MoRTH aṭangin November 23, 2015-ah sum sanction hmuh a ni a, sanction letter number chu 1665.67 MoRTH letter no. NH-13012/43/2015 /MZ/P-8 Dt 23.11.2015 a niin, sum hmuh zat chu Rs. 14,53,18,568 a ni.