Minister hoin Tuipuia tomato thar seng

Khawzawl leh Champhai inkar, Khawchhak Tuipui bul, Lungreng Zaua tomato tharte chu nimin khan Horticulture minister PC Lalthanliana hoa seng a ni a, Aizawl leh Lungleia hralh tura thawn chhuah nghal a ni.

PC Lalthanliana chuan, Mizoram sorkarin mirethei dinchhuah ngei tumte chu NLUP hmanga a vûr tawh thu sawiin, "Mi tam takin eizawnna ngêlnghet an nei tawh. State ṭhenawm aṭangin tomato ringawt pawh kan la lut tam em em a, hei hi zâwi zâwia intodelh kan tum. Purûn sen pawh hi thla khatah quintal tam tak, nuai tam man kan la lut a, hei pawh hi intodelh turin hmalak zel kan tum a ni," a ti.

Horticulture director Dr Elizabeth Saipari sawi danin, state páwn aṭanga tomato lak luh ṭhin a nih avangin sum tam tak Mizoram páwnah a chhuak a, chumi dan nan leh a hun lo (off season) laia thar chhuah a nih theih nan Horticulture department-in kawng a zawng a; Tuipuiah tomato an chìntir a ni.

Tomato chìn hun hi thlasik lai a ni a, fûr laia thar a nih theih dan tur Horticulture department leh KVK-in hlawhtling takin an enchhin a; chuta ṭang chuan fûr laia chîn theih leh natna do thei tur ngaihtuah a ni.

Tuipui khuaa chhungkaw 41 chuan Horticulture department puihnain nikum aṭang khan tomato chìnna hmun an buatsaih ṭan a, nikum khan quintal 500 vel an thar a, kuminah qtl. 950 vel thar an inbeisei.

Nimina tomato sengnaah hian Horticulture deputy diretor pathum - Vanlalruata Chenkual, H Manthianga leh V Lalzuithanga bakah, Khawzawl DHO F Lalthlamuana te an kal a; thuthar thehdarhtute an tel bawk.