Health Minister-in ZMC hostel sak tlawh

Health & Family Welfare minister Dr R Lalthangliana chuan nimin khan Zoram Medical College (ZMC)-a boys hostel leh girls hostel tur sak mek a hmunah a en a; a tlem berah kum 60 tal thlir phàa hma laka hna thawh a ngaih thu a sawi.

Minister hian hostel sakna hmunhma te, a panna kawng siamṭhat ngai lai leh zauh ngai lai te, awmze nei zawka electric lak luh leh kalpui dan turte a en a; ZMC awmna Aizawl South-III bialtu MLA Prof. F Lalnunmawia, Health secretary H Lalengmawia, ZMC Director leh hotu dangte bakah, PWD leh Power & Electricity hotute'n an ṭawiawm a ni.

Dr R Lalthangliana chuan, hostel panna kawng leh a kaihhnawih siamna turah sum lam aiin master plan neih ṭhat hmasak a pawimawh zawk tih a sawi a, "A lo berah tun aṭanga kum 60 tal thlir pha turin hna kan thawkin hma kan la ngei tur a ni," a ti.

PWD engineer-in-chief K Lalsawmvela chuan, hma la nghal turin PWD-in sum neih sa a neih loh thu a sawi rualin, "Kawng siamṭhat hi a ṭulin ka hria a, mamawh zualpui atan leh ṭha in tih ang chu ziakin in duh dan rawn thlen ula, hma kan lo la ang," a ti. Power & Electricity E-in-C Lalduhzuala Sailo pawhin, hnathawh a insut buai loh nan department dangte an thawh tur ṭheuhte en fel hmasak ṭha a thu a sawi.

Health Minister chuan Mizorama Covid-19 vei awmchhun Rev. VL Hruaia enkawl damtu ZMC/State Referral Hospital-a thawk head of department te, doctor leh thawktu dangte a kâwm bawk a; thawktute chu lawmthu hrilhin, "Tun dinhmunah Mizoramah Covid-19 vei kan nei ta lo a, naktukah eng nge thleng dawn tih sawi thei lo mah ila, in thawhrimna, huaisenna leh inpekna avangin in chungah Health Minister ka nih angin lawmthu ka sawi a ni. Tun anga ZMC kan ṭawngṭaipuina ang hi a la awm ngai lo a, Pathian vang a ni," a ti.