Ṭangrual Pawlin Aizawlah beihpui an thlak

Ṭanrual Pawl, Zoram Peoples' Movement (ZPM) hruaitute chu hlawm hrang hrangah insiamin, nizan aṭang khan Aizawl khawpui chhungah campaign beihpui an thlak ṭan a; tun thla chhung hian Aizawl khawpui chhung veng 67-ah campaign beihpui thlak hman an tum.

ZPM chuan, Zo fate tana him leh hmasawnna kawng dika hruai thei sorkar siam duhtu zawng zawngte chu kalphung thar hmanga Mizo hnam himna tling mipui sorkar din tura ṭangrual turin mi zawng zawng an sawm a ni.

ZPM beihpui thlaknaa an thu kente
1) Kum rei tak chhung Mizoramah party pahniha hruaitu pangngai­te'n kum 10 danah ro an inrèl chhâwk a, sorkar hotu lu ber chu party hotu lu ber an ni kawp zel a, hna thawk hman lék loin an intlawnsiak a, he kalphung hi mi tinin kan kham ta hle. Ṭangrual Pawl sorkarah chuan, Val Upa Council-te'n sorkar an uap ang a, lal fál tlawn rawn ngai an awm lo ang a, VIP culture tihbo a ni ang.
2) Ram dang mi ṭhahnem tak, phalna nei loa lo lutte hi, pawl
ṭhen­khatin electoral roll-ah thunin an lo hum a, tunah chuan an tlang­nél ta hle a, tualchhung mite pawh kut an thlak ngam tawh. Ṭangrual Pawl a sorkar hunah chuan phalna nei loa ramri kâna lo lut foreigner-te dap chhuah a, thliar hran a, dan tlawhchhana an chungthu khauh tak leh dik taka rel a ni ang.
3) State páwn mi contractor, supplier leh sumdawng te, ram leilung fate chanvo an rawn luahlân ṭhin leh, chutiang mite'n kan ram hruaitute an rawn bèlbul tlat zel hi a khamawm ta hle. Heng mite hian Zo fate eibar zawnna kawngah harsatna a thlen nasa a, sumdawnna kawngah chîmral hlauhawmah kan awm ta hial mai. Chuvangin, hmasawnna kawng zawh turin, hnam himna hi ngaih pawimawh hmasak ber ṭulin Ṭangrual Pawl chuan a ngai.
4) Chîmral kan nih lohna tura Mizo hnam hung bikna dan hrang hrang tun thlenga kan neihte hi khauh taka kengkawh ngam sorkar tun din a ṭul ta hle. Kan dan neih sate'n Zo fate a hum zo lo a nih chuan, state sorkarin hnam himna tling dan siamin, a ṭulna apiangah a nawr mai tur a ni.
5) Hnam humhalh te, ruihhlo do te, kawng chhe siam hnatlangte hi, an hnatlang chawhmeh fûnsaktu sorkar ni mai loin, tlawmngai pawlte'n phûr taka an puih duh tur, hmahruai ngam sorkar din ngei a ṭul ta a ni.