Hna thawk tha duhsak an ni ang - PWD Minister

PWD minister Lal Thanzara hoin nimin khan PWD Engineer-in-Chief pisa conference hall-ah Mizoram kawng dinhmunte sawiho a ni. PWD Minister chuan, hna thawk ṭha chu duhsak an nih tur thu a sawi.

Lal Thanzara chuan, PWD engineer-te chu an bial ṭheuhah mipui leh tlawmngai pawlte thawhpuia sáwm tura chahin, "Hei hian mipuite'n neitu nihna tak tak neihna kawngah a pui dawn a ni. Hna thawk ṭha chu chhinchhiah an ni ang a, duhsak an hlawh ang," a ti a; mahni mawhphurhnaah theih­tawp chhuah turin PWD officer-te a chah.

Kum dang ang lo takin kum­inah March thla aṭangin ruah a sûr a, lo hâl hun pawh bi­thliah hlei thei loin ruah sûrin a tihbuai nasat thu sawiin PWD Minister chuan, "Hei vang hian inkalpawhna kawngpui pawh kum dang aiin a chhiat nasat bakah leimin pawh a tam phah a ni. Kawng chhia vangin khualzinte zan hnih/thum kawng laka táng sawi tur awm lo leh leiminna hmun rang taka tihfel ṭhin a ni hi a lawmawm hle," a ti.

PWD Minister chuan, kawng siamna atan khawl mamawh hrang hrang - mini hot mix plant, roadroller leh motor lei a nih tawh thu a sawi a; engineer-te chu work site tlawh leh inspection uar turin a fuih a; harsatna an tawh aṭanga inen lêt nachang hre turin officer-te chu a chah.

Lal Thanzara chuan, department hmalaknate chak zawka kalpui a nih theih nan rawtna nei tan a inhawn thu a sawi a, "Department hmalakna mipui hriat tura puan zar kawngah ṭan lak a ngaih bakah, social media hman fimkhur a ngai a ni," a ti.

Sorkar laipui duh danin Mizoram State Road Fund Act siam a nih tawh thu leh Mizoram Road Fund Board pawh din a nih tawh thu a sawi bawk.

Meeting-ah hian PWD kawng enkawl siam ṭhat mek leh hmalak dan tur sawiho a ni a; Chief Engineer (Roads), Chief Engineer (Highways) leh Chief Engineer (Buildings) ten an hnuaia hna thawh leh thawh tura hma­chhawpte an tarlang.

Mizoram PWD hian kawng km. 6127.81-a thui an enkawl mek a; chu'ngte chu National Highway km. 1465.12 leh rtate road km. 4662.69 a ni.