World Mental Health Day hman a ni

Health department bultumin nimin khan Chanmari YMA Hall-ah World Mental Health Day hman a ni a, Health minister Lal Thanzara'n a hmanpui. Kumina Mental Health Day thupui chu 'Rilru hriselna; hnathawhna hmunah' tih a ni.

Health Minister chuan, World Health Organisation (WHO)-in a chhût danin, khawvelah mi vaibelchhe 30 vel­in depression an nei a, mi vaibelchhe 26 velin anxiety disorder an nei tih a sawi a, "Heng natna pahnih veitu, hna thawk thei lote vang hian kum tin US dollar tluklehding­awn 1,000 hloh ziah anga chhût a ni," a ti a; Day thupuiin a tum ber chu hna thawhnaa inpawh­tlanna, lungrualna leh inthliarhranna tel lo, rilru hriselna nena hna thawhho a nih thu a sawi.

Rilru lama harsatna chungchangah inzirtirna ngawrh taka kalpui a nih avangin thil zahpuiawm a nih lohzia leh taksa pêng dang natna nen a inang reng tih mipuiin an pawm thiam tawh viau nia sawiin Lal Thanzara chuan, "Tun aia nasa hian rilru lama harsatna neite'n doctor-te pan nacháng hria se a duh­awm hle," a ti.

Inkhawmah District Mental Health Programme-a thawk ṭha zual district pathum hnenah lawmman hlan a ni a; pakhatna chu Siaha district niin, Aizawl district leh Champhai district chu pahnihna leh pathumna an ni.

World Mental Health Day hi khawvel hmun hrang hrangah kum 1992 aṭang khan October 10-ah hman ṭhin a ni a, he ni-ah hian rilru hriselna chungchang zirho ṭhin niin, rilru lam harsatna neite hmuhsit leh endawngna a tlem tial tial theihna atan hmalak ṭhin a ni.