Central sorkar hnuaia thawkte inenkawlna tur hmun hawng

Central sorkar hnathawkte leh pensioner-te damloh nikhuaa senso tlem zawka an inenkawl theihna tur, Central Government Health Scheme (CGHS) Wellness Centre chu nimin khan New Secretariat Complex-ah chief secretary Lalmalsawma'n a hawng.

Chief Secretary chuan, Mizoramah Central government office tam tak a awm tawh thu sawiin, "Henga thawkte tan hian CGHS Wellness Centre hawn thar hi a ṭangkai hlein ka ring. He scheme hian pensioner-te a huam tel avangin kum upa lam chak lo zawkte tan inentir ngaih nikhuaah pawh Wellness Centre pan mai a hahdamthlak zawk dawn a ni," a ti.

CGHS hamṭhatna dawng theite chu sorkar laipui hnuaia hlawh la mekte leh pensioner-te bakah, anmahnia innghat an chhungte (dependent family member), Member of Parliament ni lai leh ni tawh te, Governor leh Lt. Governor hlui te, India zalenna sualtu te, Vice President hlui te, Supreme Court Judge ni lai mek leh ni tawh te, High Court Judge ni tawh te, PIB (Delhi) hnuaia accredited journalist-te leh Delhi khawpuia autonomous body ṭhenkhat CGHS-in a huamte an tel.

Wellness Centre-ah hian doctor leh nurse-te an awm a; Wellness Centre bakah hian state chhung emaw, state pawna CGHS recognised hospital hrang hrangahte inenkawlna ṭha zawk dawng tura damlote thawn (refer) theih a ni.