Mudra hnuaiah mi 9,703-in loan cheng nuai 12842.70 an la tawh

Mudra scheme hnuai­ah Mizoramah kum kal mek 2017-18 thlengin mi 9,703-in loan cheng nuai 12842.70 an la tawh.

Mizorama lead bank, State Bank of India chuan vawiin hian Kulikawn YMA Hall-ah Mudra Promotion Campaign an buatsaih dawn a, Union minister of state for Agriculture & Farmers' Welfare Gajendra Singh Shekhawat-a'n a hawng ang.

SBI tarlan danin, Mudra scheme hi mipui­in awlsam zawka eizawnna an neih theih nan leh dahkham ngai loa loan an pûk theihna tura sorkar laipuiin April 2015 aṭanga a kalpui a ni a; dahkham (security) a ngaih loh bakah, guarantor neih a ngai lo. Mudra scheme hnuaiah hian loan chi thum a awm a; Shishu hnuaiah Rs. 50,000 thleng loan a lak theih a, Kishor hnuaiah Rs. 50,000 - Rs. 5,00,000 leh Tarun hnuaiah Rs. 500,000 - Rs. 10,00,000 lak theih a ni.

Mudra scheme hi Mizoramah pawh kalpui a ni tawh a; kum 2016-17 thleng khan mi 6,929-in loan cheng nuai 9456.70 an lak tawh bakah, kum 2017-18 chhungin mi 2,774-in cheng nuai 3386 an la tawh.

Mudra scheme hi kalpui tawh hi mah se, mipui tam zawkin an hriat chian theih nan leh scheme hnuaia loan an lak theih nan kumin September 27 aṭanga October 17 chhungin India ram khawpui hrang hrangah Mudra Promotion Campaign hman mek a ni a; Aizawlah pawh vawiin hian zing dar 10:30 aṭang­in Kulikawn YMA Hall-ah campaign neih a ni ang.

Campaign-ah hian Aizawla bank awm zawng zawng an tel vek dawn a, a hmuna loan dil nghal duhte tan dil theih a ni ang a, application pek chhuah nghal zel a ni dawn.

Vawiina Mudra Promotion Campaign-a tel tur bank-te chu - Axis Bank, Bandhan Bank, Bank of Baroda, Bank of India, Bank of Maharashtra, Canara Bank, HDFC Bank, IDBI Bank, Indian Bank, Indian Overseas Bank, Indusind Bank, Punjab National Bank, Punjab & Sind Bank, State Bank of India, Syndicate Bank, UCO Bank, United Bank of India, Union Bank of India, Vijaya Bank, Yes Bank, Mizoram Rural Bank, Mizoram Cooperative Apex Bank leh MUCO Bank-te an ni.

Insurance company leh company dang aṭang-­in - BSNL, Unique Identification Authority of India, National Payment Corporation of India, Life Insurance Corporation of India, Small Industrial Development Bank of India (SIDBI), National Bank for Agricultural & Rural Development (NABARD), United India Insurance Co. Ltd. leh Oriental Insurance Company Ltd.-te an tel bawk ang.