KHAWTHLIR

Kala Utsav
RMSA bultumin nimin khan Mamit Chhimveng YMA Hall-ah Kala Utsav 2017 hman a ni a, additional DC H Lianzela'n a hmanpui. Kala Utsav-ah hian Mamit district chhunga high school hrang hrangte pualin hnam lâm, rimawi, theater leh visual arts hmanga inelna buatsaih a ni.

Kal theih loh
Lunglei SP J Lalṭhafamkima chuan thupek chhuahin, vawiin hian zing dar 9:30 aṭanga tlai dar 4 thleng Pukpui-Mausen kawng siam a nih dawn avangin lirthei kal phal a nih loh thu a puang. Lirthei khalhtute chu Hrangchalkawn-Dawn-Haulawng lam kawnga kal tura ngen an ni.

Thisen pe
Nimin khan Kanan Veng Branch YMA chuan an branch kum 44 tlin lawm nan Aizawl Civil Hospital tan thisen unit 29 an pe a, a petute mipa 25 leh hmeichhia pali an ni. Hlimen Branch KṬP pawhin Synod Hospital-ah kalin thisen unit 16 an pe a, a petute mipa 13 leh hmeichhia pathum an ni.

Awareness camp
Vawiin aṭanga October 13 thleng hian Aizawla college pariat bakah, RIPANS leh ICFAI aṭanga zirlai thlan mi 26-te pualin MFPRTC, Seling-ah 'Entrepreneurship Awareness Camp' buatsaih a ni dawn a, vawiin chhun dar 12-ah EXIM Bank chief general manager David Sinate-in a hawng ang.

Pump nuar dawn
United Petroleum Front chuan October 13, Zirtpawni hian India ram pumah nawrh an huaihawt dawn a, All Mizoram Petroleum Dealers' Association (AMPEDA) pawhin an zawm ve dawn. Nawrh huaihawt ni hian Mizorama filling station/petrol pump zawng zawng khâr a ni ang.

Thlai enkawl zir
State Agriculture Management & Extension Training Institute (SAMETI), Mizoram chuan nimin khan Agriculture directorate conference hall-ah ni hnih awh tur training an buatsaih a, thlai enkawl dan an zir a ni.