Chakma-te'n Mizo an puhna Central YMA-in an ngaimawh
YMA Central Executive Committee chu nimin khan CYMA Committee Room-ah an ṭhu a; Chakma-te'n New Kawnpui thil thleng vanga Mizote an hêkna leh dâwta an puhnaah chak taka hma la tura Mizoram sorkar ngen an rêl.
YMA CEC hian Covid-19 donaa YMA hmalaknate an thlir a; hripui chuan ziaawm lam aiin zual lam a pan nia a lan thu tarlangin, "India ram bikah pawh a ni tèlin hripui vei an pung mek zel a ni. Hengte a nih avang hian hripui do kawnga chak zawka hma la turin kan inngen nawn leh a ni," an ti. Hripui vènnaa thawktu zawng zawngte chungah lawmthu an sawi a ni.
Central YMA thuchhuak
1. Hripui vênnaa YMA sub-hqrs., group, branch-te khauh zawk leh kan huam chhung ngun lehzuala vil zui zel.
2. Kan huam chhungah hnam dang mikhual, hmun dang aṭanga lo lut an awm loh nan veng/khaw tinte inchian thar ni se.
3. State páwn aṭanga mamawh ei leh bâr leh a dang lo lutte felfai taka lut a nih leh nih loh chian a, mimal sumdawnna leh hlâwkna ûm ringawt vanga lo lutte khuahkhirh a nih theih nana ṭan lak ni se.
4. Mipui mimirte'n hripui laka kan him tlanna tur - kut silfai, hmai tuam leh inhlat taka awmte zawm ṭhat ni se. A ṭul hle a nih loh chuan páwn/khawlaia chhuah loh ni se, mithiam zawkte thu leh hla ngaihchan thiam ni se.
5. Hmun dang aṭanga lo haw, sorkar thupeka khung hran turte khunghran an nih ngei theih nan hmalak ni se.
6. Hripui léng vanga thil man to khuahkhirh a nih theih nan hmalak a, thuneitute thawhpui thiam ni se.