ZPM-in sorkar hnathawkte hlawh Pawh hêk ṭhen loh hrâm an duh

ZPM party chuan thuchhuah siamin, Finance department enkawltu Chief Mi­nister-in Mizoram state sum dinhmun dik tak sawi chiang se an duh thu leh sum a harsa a nih chuan Co­vid-19 bika hman turin MLA-te'n an hlawh aṭangin 20% aia tlem lo thawh phawt se, a theih hrâm chuan sorkar hnathawkte hlawh pawh ṭhen (cut) loh an duh thu an tarlang.

ZPM chuan, CM Zoram­thanga'n sum lamah Mizoramin harsatna a neih a rin loh thu leh Covid-19 chungchangah sum hman turah pawh limit (tàwp chin) a awm loh tur thu a sawi tih an tarlang a, "A ṭul a nih chuan ram hruaitu leh roreltu (MLA)-te hian an hlawh hi thawh khawm phawt se, a theih hrâm chuan sorkar hnathawk hlawh chu cut loh ni se tih hi ZPM party ngaihdan a ni," an ti. A ṭul ta a nih leh MLA-te thawh hnuah sorkar hnathawkte chu thawhtir ve chauh ni se an duh thu an sawi.

Covid-19 dona atan hlawh aṭanga sum inthawhtir (cut) a nih pawhin, sum tling khawm­te hi account hranpa siamin, Covid-19 bik atan chauh hman ni se an duh thu sawiin ZPM chuan, 'Thil dangah hman pên loh ni se. Pawisa hmanna pawh a langtlang (transparent) thei ang bera hman ni se' tih chu ZPM Legislature Party MLA-te ngaihdan a nih thu an tarlang.

ZPM tarlan danin, mi van­tlang chin chuan Mizoram sorkar­in sum leh pai a harsatzia an rin hriat vek. Chuvang chuan, Assembly Speaker-in May 5, 2020-ah legislature party tin aiawhte chu an hlawh aṭanga ṭanpuina sum thawh dan a sawipui a, 'A rang lama ṭhutkhawm leh a, thutlukna pawh siam thuai ni se' tiin thu dah a ni a; nimin khan an ṭhukhawm leh a ni.

A rèlnaa tel ve ngei zinga mi Congress Legislature Party (CLP) Leader-in an pass dawn a ni tih hriat sa reng chunga an party hlâwkpuina atana hman tumah ZPM chuan CLP Leader an puh a; an thawh phal zat sawi chiang duh si loa thawh an inhuam thu mipui hriata a sawi chu mak an tih thu an tarlang.

ZPM party chuan, Covid-19 vanga harsatna thleng mek chu beisei lâwk loh thil a nih thu sawiin, "Mizoram leh India ram mai pawh ni lo, khawvel pumin inang tlang veka kan tawh a ni. Chuvangin, tun hi party malin hlâwkna lo tèl fâl tum bikna tur a ni lo a, kan za vaia ṭan rual hun a ni," an ti. Hripui dona leh mipui chhawmdawlna tura mi inphalte'n CM Relief Fund-a sum an thawh chu lawmawm an tih thu an sawi bawk.

•    Finance department enkawltu CM-in sum dinhmun dik tak sawi chiang rawh se.

•    Sum a harsa a nih chuan, Covid-19 bik atan liau liaua hman turin MLA-te'n thawh hmasa se

•    Sum thawh a la ṭul cheu a nih chuan sorkar hnathawkin thawh ve chauh se, account hranpa siamin Covid-19 bik atan chauh hman ni se.

•    Party malin hlawkna lo tel fal tum bikna tur a ni lo. Kan zavaia 

ṭanrual hun a ni zawk.