LMC inthlan buatsaih turin Sorkar leh SEC-in ṭan an la

Lunglei Municipal Council (LMC) inthlan buatsaih tura ṭulte Mizoram sorkar leh Mizoram State Election Commi­ssion (SEC) ten an buaipui mek a, inthlan buatsaih theih hun tur erawh hriat a la ni lo.

Vanglaini palai zawhna chhangin UDPA changtu deputy chief minister Tawnluia chuan, LMC inthlan buatsaih tura tih ṭulte an la tih zawh loh thu a sawi a, "Municipal council din a, inthlan buatsaih tur chuan tih tur a tam khawp mai. Tunah hian chungte chu chak taka buaipui mek a ni a, peih hun tur leh inthlan buatsaih theih hun tur erawh hriat theih a la ni lo," a ti.

Tawnluia chuan, LMC a taka kalpui turin tih tur ṭul eng emaw zat an tih tawh thu sawiin, "Staff dah a nih dawn pawhin deputation-a tih zel a ngai rih a, chungte chuan hun a duh rei. Tunah hian LMC pisa tur buaipui mek a ni a, peih ṭêp a ni tawh," a ti a; LMC pisa tihfel a nih hma chuan inthlan buatsaih chi a ni loh thu a sawi.

Vanglaini thu dawn danin, LMC pisa tur chu peih thawkhat a ni tawh a, hawn thuai tum a ni a; pisa atan hian Lunglei Convention Centre-a hmun ṭhenkhat hman tum a ni.

Inthlan buatsaihtu tur SEC pawhin inthlan atana ṭulte an buaipui mek a, inthlan buat­saihna tura sum ngaite pawh an dil angin Mizoram sorkarin a pe tawh. LMC inthlan atan hian SEC chuan Lunglei DC Kulo­thungan A chu District Muni­cipal Election Officer & Appellate Authority turin a ruat a ni.

SEC hian LMC inthlana hman tur electoral roll revision a kalpui mek a, September 23, 2022 khan draft roll tlangzarh a ni a, final roll chu October 14, 2022-ah tlangzarh a ni ang.

Vanglaini palai zawhna chhangin state election commissioner Laima Chozah chuan, LMC inthlan hun tur chu SEC-in sorkar sawipui turin danah ziah a nih thu a lo sawi tawh a ni.