Sialhawk khuain lakhuihthei hralhna aṭangin cheng nuai 160 vel an hmu

Sialhâwk khuaa lakhuihthei chíngtute'n kar hmasa khan an lakhuihtheite an seng zo a, kuminah lakhuihthei quintal 12,100 vel hralhin, cheng nuai 160 vel an hmu chhuak.

Vanglaini palai zawhna chhangin Sialhawk Pineapple Grower Society (SPGS) hotute chuan, kumina an lakhuihthei chìnte chu October 1, kar hmasa Inrinni khan an seng zo tih an sawi a, "Nakkum ṭhálah kan seng leh ang. Kumin hian Mizoram hmun hrang hrang bakah, state dang leh ram dangah quintal 12,100 vel kan hralh," an ti.

Lakhuihthei chu kg. khat Rs 10-in agent-te hnenah an hralh thu sawiin SPGS hotute chuan, "Lakhuihthei quintal 12,100 kan hralhna te, kan khawmi agent-te chhawr lakhuihthei buaipui tute hlawh leh lirthei min hman sak mante nen a vaiin cheng nuai 160 vel kan hmu," an ti a; a thar tam ber chhungkuain quintal 370 an thar thu an sawi.

SPGS hotute chuan, Sial­hawkah lakhuihthei chínga eizawng chhungkaw 240 an awm thu sawiin, "Lirthei hmanga inphur chhuak kan nih avangin link road-ah fûr laiin harsatna kan tâwk nasa a, kawng diak leh chhia vangin kilometer 3/4-te hi darkar 3 velte kan tlân ṭhin," an ti.

Lakhuihthei dahṭhatna (storage) an neih loh thu sawiin, hralhna tur awm dan azirin a tlachawpa an lawh mai ṭhin thu leh, dahṭhatna tur hmun an neih loh avangin a ṭhen chu a kungah a hmin/ ṭawih chhiat hman ṭhin thu an sawi.

Kuminah lakhuihthei an thar tam vanglaiin sorkar sum harsat vang nia ngaih theihin a hralhna turah an buai thu leh eng emaw zat a ṭawih hman thu SPGS hotute chuan an sawi a, "Min bialtu MLA Pu Tawnluia, deputy chief minister ni bawk hnenah kan thlen a, a hmalaknain sorkar sum hmangin MIFCO-ah kan pe ta char char a, chu chuan min chhâwk zângkhai khawp mai," an ti bawk.