Local Products Expo buatsaih

Mizoram University-a Mizo department chuan Ministry of Culture bul­tumin Azadi Ka Amrit Mahosav kal zelah nimin khan Millennium Centre chungzawlah Evolution Fest - Local Products Expo an buatsaih a, Commerce & Industries minister Dr R Lalthangliana'n a hawng.

Tualchhunga siamte phochhuahna ni khat awh Expo-ah hian dawr 20 a awm a; lemziak, thil lem siam, hnáng leh mau aṭanga siam kawr, ei leh in lam, puantah leh puan aṭanga siamte leh tualchhunga siam thil dangte pho chhuah a ni.

Dr R Lalthangliana chuan, Mizorama thar chhuah leh siam chhuah­te hmuh theiha pho chhuah a ni chu ropui a tih thu sawiin, "Thil thar a hring chhuak dawn a ni," a ti a; thil siam ṭhenkhat chu Mizoram páwna hralh a ni chu a chhuan thu a sawi.

Commerce & Indus­tries Minister chuan, hlawh­tlinna an chan theih nan thil siamtute chu rin­awm leh taima taka ṭang zel turin a chah a, "Sorkar hnain mi zawng zawng a daih loh avangin thiamna bik neite'n eizawnna an dap chhuah zel a ngai. Sorkar department hrang hrangte'n mahni kutkea eizawnga thiamna neite pho chhuahna platform kan ngaihtuah a, hma kan lak zel a ṭul a ni," a ti.