Lirthei chesualah mi pahnih an thi

October 4, Thawhlehni tlai leh nimin zing khan Khawruhlian dáiah lirthei pahnih - Bolero leh Alto car an chesual a, mi pahnih an thi. Mitthite hi Lalrinawma (66) h/o Biakkungi, Armed Veng leh Gon Bharbhuiya s/o Islam Uddin Bharbhuiya, Assam-te an ni.

Vanglaini thu dawn danin, October 4 tlai dar 4:30 vel khan Khawruhlian dáiah lei tawlh a awm avangin lirthei eng emaw zat an táng a, Gon Bharbhuiya leh a mi phurh pawh an lirthei aṭangin an chhuk a; mahse, lirthei chu lei tawlhin a hnâwl mai dawna a lan avangin Gon Bharbhuiya chu a lirthei dah sawn tumin a kal leh a, lirthei chawpin lei tawlhin a hnâwl ta a ni.

Gon Bharbhuiya ruang zawngin Khawruhlian khawtlang leh 1st MAP mi leh sate'n an thawk nghal a, nimin chawhma dar 11 vel khan hmuh a ni. Khawhruhlian khawtlangin Sesawng thleng an thlah a, Sesawngah a chhungte hnenah an hlàn.

Nimin zing dar 2:30 vel khan Gon Bharbhuiy te chetsualna aṭanga hla lo têah Alto car pakhat chu kawngpui thlang lam min pawpah a tlân lut a, a hmunah Lalrinawma, Armed Veng a thi.

Car-ah hian Armed Veng mi vek pali an chuang a, mi pathum dang an hliam a, Khawruhlian damdawi-inah enkawl niin, nimin chhun dar 1 vel khan Darlawn aṭangin helicopter hmangin Aizawl panpui an ni. Helicopter hman man hi bialtu MLA Robert Romawia Royte-in a tumsak.

Khawruhlian aṭanga thu dawn danin, Alto car hian lirthei dang lehpelh a tum a, chhûm a zìn nasat avang leh kawng pawp/hêk bulah chhinchhiahna dah a nih loh avangin kawng pawpah a tlân lut a ni.

Tarlan tawh angin, NH-150 kawngpui, Khawruhlian khaw hnuaia laih chu a min fo a, kawngpui a ping ṭhin a, hun rei tak tak lirthei kal tlang theih lohin a lo awm tawh ṭhin.

Kawngpui ṭha lo leh leimin ṭhin avangin Khawruhlian All NGO Committee chuan August 1, 2022 khan zing aṭangin tiamchin awm loin kawngpui an lo dang tawh a; mahse, an thil phûtte sorkarin tihhlawhtlin a tiam avangin August 1 vêk chawhnu dar 1:45-ah kawngpui dan chu an titawp. Kawngpui siam hna hi NHIDCL hnuaia thawh a ni.