MPCC OB-ten khawchhak tlangdung an fang ; District thar thuam famkim hna chu Congress-in kan tum ve thung ang - Lalsawta

Mizoram Pradesh Congress Committee (MPCC) president Lalsawta chuan, Saitual leh Khawzawl district-te chu MNF sorkarin a pe tawh a, a thuam famkim hna chu Congress party-in an tum ve thung dawn tih a sawi.

MPCC elected office bearer-te chuan Mizo­rama district-te tlawh chhuah programme hman mekah tunlai hian khawchhak lam tlang­dung an fang mek a; Sep­tember 4, Thawhlehni khan Keifang kâwnah leh nimin khan Khawzawl Zaingen YMA Hall-ah vantlang inkhawm neih niin, Lalsawta leh hruaitu dangte'n thu an sawi a ni.

MPCC President chuan nimina Khawzawla vantlang inkhawmah thu sawiin, Khawzawl leh Saitual district thar chu an lawmpui tak zet thu a sawi a, "MNF-in a pek an tum tawh a, a thuam famkim hna chu Congress party-in kan tum ve thung ang," a ti.

Dinchhuah tuma ṭan la mekte puih nuam an ti nia sawiin Lalsawta chuan, "Kan ṭanpui zel dawn. Chu chu kan Manifesto lian ber pawh a ni. Kawng tinrénga eizawnna ngêlnghet siam hi kan tum a ni a, Mizote'n ram kan nei, mipui kan nei bawk, chumi enkawltu tur sorkar ṭha chu kan mamawh ber a ni," a ti a; rilru puthmang, ngaihtuah dan leh ngaih­hlut záwngte thlak a ngaih thu a sawi.

MPCC President chuan, nakkum tàwp lamah inthlanpui a awm dawn tih sawiin, "Kan chhiah tling khawm dik lo taka suasamtu te, chutiang avanga lo hausa tate chuan mipui sum an ei sak hmangin min lei an tum dawn, kan vote lei an tum dawn. I vote ringawt lei an tum a ni lo, nangmah kha lei che an tum a ni zawk," a ti a; inthlan dawna mi lei tumtute'n mihring lei theih - sal leh nawh­chizuar ang lekah mipui an ngai tihna a nih avangin, lei theih ni lo tur leh rinawmna hralh lo turin mipui a chah.

Lalsawta chuan, Congress party an sorkar a nih chuan thlai chìn uarna hmun bik an siam dawn tih sawiin, "Thlai chíngtute mamawh inṭâwmte chu ṭang puih­­na hmangin kan pui dawn. Ṭanpuina hi nuai bi aṭanga mamawh inṭawm - kawng, electric, tui lâk, adt. siam nan vaibel­chhe tél thlengin kan ṭanpui dawn a ni," a ti.

MPCC vice president Lal Thanzara chuan, "Kan ram dam lo mek hi a tidam theitu chu Congress party kan ni," tiin, tihdam rawngbawl hna thawhpui turin Mizoram mipui a sáwm a, "Tunah hian tihpalh sorkar kan hrawn mek a, sum leh pai an enkawl dante, dan leh hrai an enkawl dante a ṭhat loh zia kan hria," a ti a, tihpalh sorkar a din tawh loh nan theihtawp chhuah a ṭul thu a sawi.

Congress party-in an thutiam an hlen zel nia sawiin Lal Thanzara chuan, "CM ni thei tur party leader pathumte hi en ula, eiru ngai lo, sum enkawl thiam, mi rinawm Pu Lalsawta aia thlan tur zawk rêng an awm lo. Kan ram damlo tidam tur hian thawhpuiah Mizoram mipui ka sawm a che u," a ti.

MPCC treasurer Zodintluanga Ralte pawhin thu sawiin, "Kum 20 chhung rambuaia kan awm avanga rethei em ema kan awm laia remna thlen a, hmasawnna bul ṭantu, mi rethei zawkte dâwm kângtu, ṭanpuitu chu Congress a ni," a ti a; Congress party-in ṭhat loh theih lohna báwm an din ngei dawn niin a sawi.

Zodintluanga chuan, MNF sorkar hnuaiah hel an tam hle ṭhin tih sawiin, "Hmasawnna a thleng ngai lo a, ram a rálmuang ngai hek lo. Congress a sorkar apiangin ram a rálmuang a, mipui an zalên a, hma an sawn ṭhin. Minister leh MLA eiru an awm chuan ka bàn ang ti ngam hruaitu kan nei a, eirûkna laka kan fihlim lo a nih chuan min bàn mai dawn. Chutiang ti ngam chu party dangin hruaitu an nei ve lo," a ti.
MPCC elected OB-te district tlawh chhuah programme-ah hian district 11 zinga pariat an tlawh tawh a ni.