Bawlhhlawh sâwngbàwlna tur hmun enfiah

Champhai District Cleanli-ness Week Celebration Committee member-te chuan an chairman James Lalrinchhana, district bawrhsap hoin nimin khan Mualkawi rama bawlhhlawh sâwngbàwlna hmun tura ruahman leh Faina Hapta puala hnatlangte an tlawh.

James Lalrinchhana chuan, bawlhhlawh ṭawih thei leh ṭawih thei lo thliar hran chu FOCUS project kaltlanga loneitute hnena leiṭha siam dan inzirtirna kalpui tum nena kalkawp thei a nih thu a sawi a, "Leiṭha sem ngawt ni lo, a siam dan inzirtir hi nakin zel atan a pawimawh. Bawlhhlawh ṭawih thei leh ṭawih thei lo thliar hran hi leiṭha siamna turah pawimawh hmasa a ni," a ti.

Champhai DC chuan, Faina Hapta puala veng hrang hrangte hmalakna fakawm a tih thu a sawi a; Champhai district fai leh thianghlim siam kawngah theihtawp chhuahpui turin district mipui a sáwm.

Champhai district-a Faina Hapta hman dan tura duan zingah nimin khan mimal leh pawl anga bawlhhlawh sâwngbàwlna kalpuite chu Committee member-te'n an tlawh a; mimal bawlhhlawh thliar hranna kalpui zingah Champhai Vengthlanga Vanlalṭhafamkima hmalaknate an zir chiang a ni.

Cleanliness Week Celebration Committee member-te hian Mualkawi rama Solid Waste Management Centre tura ruahman an tlawh a; bawlhhlawh paihna tura siam pakhat belhchhah nan pali dang siam dan tur an sawiho nghal bawk.