Naute laka pawikhawihna chhuinaah Police-in mipuite puihna an ngen

September 16, 2022 zana Ebenezer Hospital-a Zonuam Veng hmeichhe naute kum 2 leh thla 5 mi thi tain mipat hmeichhiatna thilah khawih chhiat a tâwk nia hriat chungchang police-in an chhuina pui thei tur thil pawimawh hria an awm chuan, police hriattir tura ngen an ni. Police-te chuan naute nu leh pa an man ve ve tawh.

Mizoram Police chuan thuchhuah siamin, naute taksaa hliam enin, a chungah mipat hmeichhiatna thila pawi khawihna a awm ngei nia a lan thu an tarlang a, "Naute nu leh pate police-te'n an kawmna aṭangin anmahni bak chu amah enkawl a, hetiang thil ti tur khawpa lo khawih ve dang an awm theia a lan loh avangin rinhlelhawm ber an ni lo thei lo. Naute pa hi October 1, 2022 khan man niin, naute nu hi October 3 hian chiang zawka thu zawhfiah turin man a ni ve leh a ni," an ti.

Police thuchhuah tarlan danin, naute chunga hursualna thleng nia rinhlelh a nih avangin All Women Police Station-ah POCSO Act Section 6 leh IPC Section 376AB tlawh chhanin, September 20, 2022-ah thubuai ziah luh a ni a, case number chu 47/2022 a ni.

All Women PS aṭanga thu dawn danin, naute nu leh pate hi an la kawl mek a, a ṭul angin thu zawhfiah chhunzawm zel an ni.

Police-te chuan, naute chênpui, a nu leh pa bakah, an awmna in chung chiaha chêng naute pi leh pu te, a ní leh naute patea te nupa chu vawi tam tak thu zawhfiah an ni tawh tih an tarlang a, "Ṭhenawm khawveng leh hmun hrang hranga an chhungkaw chanchin hre deuh te, khawtlang hruaitu ṭhenkhat bakah Ebenezer Hospital-a thawktu eng emaw zat kawm an ni tawh," an ti.

Nautein rorelna dik a hmuh ngei theih nan police-te chuan mipui ṭanpuina an dil a, "Chhui chhuahna kawnga min pui thei tur pawimawh hria kan awm a nih chuan rang taka police min hriattir vat turin mipui kan ngen tak meuh meuh," an ti a; police hnena thu thlentute chu thup tlat an nih tur thu an tarlang.

Police tarlan danin, Vaivakawn Police Station-in September 17 zing dar 12:15-a Ebenezer Hospital medical officer aṭang phone an dawn a, damdawi-inah hmeichhe naute a thi a, a ruang an sâwngbàwl laiin a kap báwrah thil pangngai lo nia rinhlelh hmuh a nih thu leh mipat hmeichhiatna kaihhnawih a nih theih thu hriattir an ni. Police-te'n Ebenezer Hospital an pan nghal.

Naute ruang chu September 17-ah Civil Hospital, Aizawlah doctor pahnih - gynaecologist leh forensic medicine & toxicology doctor-te'n an endik a, naute kap báwrah thil pangngai lo nia rinhlelh hmuh a ni. Chumi hnuah enquiry officer, sub-inspector Lalsangbera Sailo, Zonuam Out Post-in All Women PS-ah enquiry report a thehlut a, thubuai ziah luh a ni.

Doctor-te hmuh danin, naute thih chhan chu thâwkna kawng vúng (acute laryngotracheobrontis with severe respiratory distress) a ni a; a chunga mipat hmeichhiatna kaihhnawih thil thleng nia lang nen inzawmna a nei lo.

Naute vaginal swab leh anal swab pawh Forensic Science Laboratory-ah endik a ni a, FSL report chu September 28 khan police-in an dawng a, semen (mipa chî) hmuh a ni lo tih tarlan a ni.

Naute chunga pawikhawihna thleng nia rinhlelh chungchangah hian Zonuam Out Post, Aizawl PS leh Vaivakawn PS-ahte complaint (FIR) a lut a, mahse, suo moto hmanga All Women PS-a thubuai ziah luh tawh nen thil thleng thuhmun a nih avangin register a ni lo.