Covid-19 vei enkawl lai mi 102 awm

October 4, Thawhlehni khan Mizoramah Covid-19 vei mi 33 hmuh chhuah a ni a, nimin khan hripui vei dam tawh mi pakua chhuahtir niin, hripui vanga thi an awm lo. Nimin tlai khan hripui vei enkawl lai mi 102 awmin, ni hmasa aiin an tam leh hret.

Thawhlehnia district hrang hranga Covid-19 positive hmuh zat chu - Aizawl district-ah mi 12, Mamitah 10, Khawzawlah pali, Lungleiah pathum leh, Serchhip leh Saitual pahnih pahnih ve ve a ni a; swab sample endik 331 aṭanga positive rate chu 9.97% a ni.

IDSP record angin, Mizoramah sample 19,83,895 endik tawh a ni a, Covid-19 vei 2,38,523 hmuh chhuah a ni tawh. Nimin tlai dar 5 thlengin mi 2,37,698 (99.65%) chhuahtir an ni tawh a, mi 723 (0.30%) thi tawhin, enkawl mek mi 102 (0.05%) an awm.

Nimin tlai dinhmun angin, Kolasib leh Lawngtlai district-ah Covid-19 vei enkawl lai an awm tawh rih lo a; active case 10 aia tamna district pali - Aizawl, Lunglei, Mamit leh Khawzawl district a awm mek a ni.