KHAWTHLIR

Thisen pe
KṬP, Bethlehem Vengthlang Branch chuan an din champha pualin nimin khan an kohhran hall-ah thisen pek an huaihawt a, Synod Hospital tan thisen unit 45 an pe a, petute mipa 35 leh hmeichhia 10 an ni.

Minister-in tanpui
Rangvamuala ram pum huap gospel camping neih tura inbuatsaihna kal mek chu nimin khan minister Dr R Lalthangliana'n a tlawh a; a ṭul apianga an hman atan Rs 1,00,000 a hlàn. Minister hi a nupui Ngurmawii Sailo, MHIP Gen.Hqrs president-in a ṭawiawm a ni. Camping hi October 17, 2022-ah ṭan a ni dawn a, Bethel Ministry speaker Frederick Lalrindika chu speaker a ni ang.

Jubilee hmanpui
Human Resource Development board vice chairman L Thangmawia, MLA chuan October 4, Thawhlehni khan Zote South Branch YMA kum 60-na, diamond jubilee lawmna a hmanpui. MLA chuan, YMA ropuina em em chu langsar lo rawngbawlna a kalpui ṭhin vang a nih thu leh Mizoram leh hnam kal zelna atan hnam ṭawng ngaihhlut a ṭul thu a sawi.

Bawlhhlawh sawngbawlna tlawh
Kolasib bawrhsap John LT Sanga hoin nimin khan Kawnpui Town Sanitation Committee member-te'n Faina Hapta pualin Dihmuntlanga bawlhhlawh sawngbawlna Solid Waste Management Centre an tlawh. Chhungkua aṭanga bawlhhlawh thliar hran ṭhat loh avangin a sâwngbàwlnaah harsatna a awm phah ṭhin thu leh Centre chu tihchangtlun zel tuma hmalak a nih thu tarlan a ni.

Nurse-ten Thutiam chham
Synod Hospital Nursing School chuan October 4, Thawhlehni khan zirlai tharte thu tiamtirna leh lukhum khumtirna inkhawm vawi 49-na an buatsaih a, Synod senior executive secretary Rev. C Zorammawia'n a hmanpui. Zirlai tharte chuan Synod Hospital-a nursing superintendent Lalzikpuii kaihhruaiin bati chhiin thutiam an chham a ni.