MZP hruaitute'n CM an kâwm

MZP General Hqrs office bearer-te chuan nimin khan chief minister Zoramthanga chu a pisaah an hmu a; state ramri, NHIDCL kawng siam chhe lutuk leh Zofest 2022 chungchang leh thil pawimawh dangte an sawipui.

MZP tarlan danin, tun hnaia Assam lamin Bairabi Zophaia status quo chhunga bûk pahnih an sak chungchangah MZP hruaituite chuan, CM-in rang taka hma a lak avangin lawmthu an hrilh a; Assam chêt dan uluk taka thlìthlai reng a ngaih thu sawiin, Assam chetna chu na taka chháng lêt vat zel turin an ngen. Chief Minister chuan, a theihna apiangah hma a lak tur thu leh Assam CM nen pawh sawi dun an tum thu a lo hrilh a ni.

MZP hruaitute chuan Mizoram hmun hrang hranga national highway kawngpui siam mektu NHIDCL sûlhnu a chhe hle nia sawiin, an lung hmanin duhthu a sàm loh avangin hma la turin CM an ngen a; CM Zoramthanga chuan a lo en zui tur thu leh a kaihhnawih ministry sawipui a tum thuin a lo chháng niin an tarlang.

Thangram Indigenous Peoples Movement (TIPM)-in an chenna square mile 180 chu Mizoram state chhunga rín lut tura an hmalakna chu a theih ang anga hmalakpui turin MZP chuan CM an ngen a; CM chuan, sorkarin theih ang anga hma a lak mek thu a lo hrilh niin an tarlang bawk.