State hmasawn ber zinga Mizoram a awm theihna atan hma kan la - CM

Chief minister Lal Thanhawla chuan, Mizoram chu state hmasawn ber zingah a tel theihna atan sorkarin theihtawp an chhuah mek thu a sawi a, "Hemi tihhlawhtlinna atan hian NEDP duan a ni," a ti.

NEDP pêng pakhat, MEDMOC-in a buatsaih Entrepreneurship Summit 2017 leh Mizoram Kailawn Business Plan Contest khârna, Mizoram University-a buatsaihah Chief Minister chuan, "India ram ṭhang mekah Mizoram hi a awm mai mai bik lo a, state hmasawn berte zinga mi ni turin theihtawp a chhuah a; chumi kawnga a thil tumte tihhlawhtlin nan NEDP duan a ni," a ti a; NEDP hnuaiah entrepreneur-te tihhmasawn chu ngaih pawimawh zual bik a nih thu a sawi.

Tun hma lamah mi zawng zawngin sorkar hna thawh tum ṭhin mah se, tunah chuan sorkar hna thawh tur a tlem bakah, mahni kutkea din, enzawnna insiam chawp leh mi dangte tana eizawnna siam tum ṭhalai an pung tih sawiin CM Hawla chuan, "Mahni kutkea din tum, indap chawp leh mi dangte eizawnna tur hna tam tak siam thei nih chu khawvelin a ngaihsan a ni," a ti.

Planning minister Lalsawta pawhin thu sawiin, Mizoram hausak theihna kawng awm chhun chu agriculture a kaihnawih thilte a nih thu a sawi a, "Huan thlai, buh leh bal te tam zawka thar tur leh hausakna sum leh paia chantir tur chuan agriculture & allied service sector behchhana entrepreneur hmalakna leh inzar pharhna a pawimawh berah sorkar chuan a ngai a ni," a ti.

B-Plan Contest-a dilna thehlut mi 287 zinga intihsiakna paltlang mi 254 zinga final round lut mi 10 zinga mi pangate chu ṭanpuina sum leh chawimawina thuziak lawmman atan hlan an ni a; pakhatna Lalsiamthara hnenah Rs. 4,00,000, pa­hnihna Lalhlupuii hnenah Rs. 3,00,000 leh pathumna Lalawmpuia Pachuau hnenah Rs. 2,00,000 hlan a ni.