MPC-in NH-54 kawngpui kama Bawlhhlawh paih titawp turin phût

MPC chuan thuchhuah siamin, Tuirial kawngpui kama bawlhhlawh chhêk khawmte leh sumdawnna atana hmangtute chu a rang thei ang bera titawp tur leh, AMC councilor-te'n dan loa chêt chíngte thlavâng an hauh ṭhin titawp vat turin chief minister Lal Thanhawla leh AMC mayor PC Lalhmingthanga te an phût.

Aizawl Municipal Corporation-in Tuiriala bawlhhlawh a paihna hmun leh a chhehvelte chu nimin khan MPC hruaitute'n an tlawh a; thuchhuah siamin, an hmuh dante an tarlang a ni.

MPC chuan, AMC-in pubilc private partnership (PPP) mode anga Aizawl veng hrang hranga bawlhhlawh paih ṭhinah, a paihna hmun tak (dumping ground) thleng loa Tuirial Airfield veng bul, Bungherh ram chhunga kawngpui kamah mi eng emaw zatin bawlhhlawh an lo hláng thla ṭhin tih an sawi a, "Bawlhhlawh zinga suma chantir theih chin an lo thur chhuak a, an duh tawk an lak hnuah bawlhhlawh dang chu kawng sir hmun tam takah an paih darh ṭhin a ni," an ti.

Aizawl khawpui kawt chhuah pakhata bawlhhlawh tenawm leh rimchhe em em a inchap darh nuaih mai chu mualphothlak an tih thu an sawi bawk.