KHAWTHLIR

Thisen pe
Nimin khan Chaltlang Higher Secondary School NSS unit chuan an sikulah blood donation camp an huaihawt a, mipa 45 leh hmeichhia 19 ten Aizawl Civil Hospital tan thisen unit 64 an pe. Melthum Branch KṬP pawhin an din champha pualin nimin khan Synod Hospital Blood Bank-ah kalin thisen unit 9 an pe a, a petute mipa pariat leh hmeichhia pakhat an ni.

Heroin man
Champhaia Excise & Narcotics enforcement-te chuan nimin zing dar 7.30 khan Champhai IB Vengah heroin gram 22 leh a neitua puh Vanlalsiama (37) s/o Chhawntluanga, Champhai IB Veng an man. Vanlalsiama hi NDPS Act tlawhchhanin thubuai siamsak a ni.

Education campaign
Thawhlehni khan Sailulak khuaah Education Campaign buatsaih a ni a, Serchhip DEO Lawmawma'n a hmanpui. Campaign-ah hian zirna lama khawtlangin hma a sawn theih nana ṭha nia hriat hrang hrangte sawihona leh zirlai naupangte fuihna hun hman a ni.

Mockdrill sawiho
Mamit District Disaster Management Authority chu nimin khan additional DC H Lianzela hoin DC conference hall-ah an ṭhukhawm a; chhiatrupna thlen thulha inven dan leh chet lak dan tur inzirtirna (mockdrill) Mamita neih dan tur an sawiho. Nunchan zirna atan hian Mamit khawpuia hmun 10, sorkar building hrang hrang, bazar leh bank-te an thlang a ni.

Tanpuina sem
Commerce & Industries departmenty chuan nimin khan Champhai Vengsang YMA Hall-ah NLUP leh NLUP-NEDP convergence ṭanpuina an sem a, bialtu MLA TT Zothansanga'n a hmanpui. Ṭanpuina hi NLUP dawngtu mi 128 hnenah cheng nuai 48.18 leh NLUP-NEDP convergence ṭanpuina dawngtu mi pali hnenah Rs. 2,00,000 pek a ni.