MNF-in MLA leh mipui zah loah CLP leader Zodintluanga an puh

MNF party chuan thu­chhuah siamin, Covid-19 dona atan sorkar hnathawkte bituk zat neia an hlawh aṭanga pawisa thawhtir hmain minister leh MLA-te'n thawh hmasak ṭha an tih thu Congress Legislature Party (CLP) leader Zodintluanga'n a sawi chu MLA dangte leh mipui zah lohnaa an ngaih thu an tarlang.

Zodintluanga chuan sorkar hnathawkte'n an hlawh (basic pay) aṭanga 10% leh 5%-te pe tura an inpe chu lawmawm a tih thu a sawi rualin minister leh MLA-te'n hma an hruai loa ngaiin a dem tel nia sawiin MNF chuan, "MLA-te hian an chawlhkar khat hlawh (25%) leh minister-te'n an chawlhkar hnih hlawh (50%) Covid fund (CM Relief Fund) atan an lo pe hmasa tawh a ni," an ti.

MNF tarlan danin, MLA-te'n Covid-19 dona atana sum an thawh zel dan tur ngaihtuahin May 4, 2020-ah Assembly speaker Lalrinliana Sailo hoin party tina legislature party aiawhte an ṭhu khawm a, CLP leader Zodintluanga pawh telin, thutlukna siam thuai tura ngaihtuah mektu zinga mi a ni.

Legislature party hrang hrangte'n sum an thawh zel dan tur an ngaihtuah mek laia CLP Leader thuchhuah siam dan chu puitlin loh thlak an tih thu sawiin MNF chuan, "Pu Zo­dintluanga hian a MLA-puite leh mipui a zah lo hleah kan ngai. Party legislature leader dangte chuan sawi ṭul loah an ngai a ni ngei ang, puitling takin an thutlukna siamna tur chu an rêl khawm hun atan an dah a ni," an ti.

MNF party chuan, CM Relief Fund-a MLA leh minister-te'n an hlawh aṭanga 25%-50% an thawh tawh chhunzawm dan tur an rél mek tih  sawiin, "An thutlukna hriat thuai theih inbeisei ila. Chutih chhunga mipui ngaihtuahna hruai kawi thei záwnga awmze nei loa lo ràlsài vak vak hi chu politics hruaitu puitlinga ngaih chinte chuan tih loh ni se a duhawm khawp ang," an ti a; Mizoram sorkarin Covid-19 donaa cheng vaibelchhe tam tak a hman tawh dan chu Chief Minister-in mipui hmaah a tarlang vek tawh niin an sawi bawk.