Congress MLA-te'n ramria duty an tlawh

Congress Legislature Party (CLP) leader Zo­dintluanga leh an party MLA Lalrindika Ralte-te chuan nimin khan Mizoram hmarthlang lama Assam leh Tripura ramria Covid-19 vanga ramri vénga rammute leh YMA duty-te an tlawh kual a, ṭanpuina chi hrang hrang an pe.

Tuidam khuaa Taitesena Group YMA hruaitute'n an lo hmuahnaah thu sawiin Zodin­tluanga chuan, "Ramria engkim huama rammúte kan ngaihlu a, a hmun ngeia tlawh kual hi kan tih turah kan ngai. Mizoram tana in tawrhna zawng zawngte hi Mizoram mipui leh Congress party chuan kan hriatpui che u a, in thawhrimna hi a thlâwn lo ang tih kan ring tlat a ni," a ti.

Lalrindika Ralte pawhin thu sawiin, Hachhek bialtu a nih ang­in a bial chhung­a ramria duty-te chu a ṭanpui zel dawn tih a sawi a; harsatna an neih apiang­ rang taka a hnena thlen turin a chah.

MLA-te hian nimin khan Dárlâk, Tuidam, Tuipánglui, New Eden, Kawr­thah, Réngdil, Zamuang, Zawlnuam, Búngṭhuam, Luimawi leh Kanhmun khuate an tlawh a; task force duty-te leh Mizoram police duty-te hnenah an mamawh chi hrang hrang an lei nan pawisa an pek bakah, Taitesena Group YMA leh Langkaih Group YMA hnenah Rs. 20,000 ve ve leh solar lamp eng emaw zat an pe. MLA-te hi Congress party hruai­tu dangte'n an ṭawiawm a ni.