N Vanlaiphai kudam thar hawn a ni

North Vanlaiphaia Subsidiary Distribution Center Godown thar chu nimin khan bialtu MLA, minister Lalchamliana'n a hawng. Minister chuan, buhfai man tihpun tumna awm ṭhin mah se, mipui dinhmun ngaihtuahin tihsan a la ni rih lo tih a sawi.

Lalchamliana chuan, Mizoram mipuiin tláwm zawka buhfai an lâk theihna tura FCSCA department inpekna leh hnathawh te, Myanmar leh Bangladesh thlenga kawng an dap ṭhinte chu fakawm a tih thu a sawi a, "FCI aṭanga state quota buhfai kan kham loh avangin open market aṭangin to zawka lei a ngai ṭhin a, chu'ngte chu a man tláwmin mipui hnenah pek zel a ni. Buhfai man tihpun tumnate awm ṭhin mah se, sorkar chuan mipui dinhmun ngaihtuahin a la tisang rih lo," a ti.

Eirawngbawlna gas, petrol leh diesel-te mipuiin an nghei loh nan sorkarin theihtawpin hma a la ṭhin tih sawiin Lalchamliana chuan, "Supply department pawhin an hahpui hle ṭhin. An thawhrimna zarah mipuite nghei loin thlamuan takin kan awm a ni," a ti a; kudam thar chu ṭangkai taka N Vanlaiphai leh a chhehvel khuate'n an hman a beisei thu a sawi.

N Vanlaiphai kudam hawnna hi FCSCA secretary Ramdinliani'n a kaihruai a; cheng nuai 183.92 hmangin Babie Construction & Consultancy Services-in an sa a ni. Kudam bakah thawktute quarters leh toilet block sak tel a ni.

Kudam hi Mizoramin NABARD hnuaiah Construction of Intermediate Storage Godown & Related Infrastructures Project cheng vbc. 39.61 a hmuh aṭanga kudam 21 sak zinga mi a ni.