Mipuiin beiseina thar an mamawh - MPCC President

Mizoram Pradesh Congress Committee office bearer-te khawchhak tlangdung fang chuan nimin khan Champhai Bethel Veng community hall-ah vantlang inkhawm an buatsaih a; MPCC president Lalsawta chuan, mipuiin beiseina thar an mamawh thu a sawi.

Lalsawta chuan, Mizoram mipuiin beiseina thar an mamawh tih sawiin, "Mipuiin keimahniah beiseina thar an neih theih nan kan danglam ngam a ngai. Congress hi kan danglam tawh a, rilru thar kan pu tawh a ni tih Mizoram mipui kan hmuhtir a ngai. Kan minister leh MLA hlui te, kan block leh unit hruaitute danglam rawh se tih lam a ni lo, mi dang nun en loin mahni ṭheuh hi danglam i tum zawk ang u," a ti.

Mizoramin tun dinhmunah harsatna a ngah thu sawiin Lalsawta chuan, "Harsatna kan hmachhawn mekte chinfel a, hmasawnna thlen hi Congress party-in kan tum a ni. Mizoram siamṭha tur hian kan thawh nasat a, kan ṭawngṭai nasat a ngai hle," a ti a; an tum tak tak phawt chuan an la dingchhuak thei tih hriat a ṭul thu a sawi.

MPCC President chuan, Congress party an sorkar a nih chuan Mizoram economy siamṭha a, kut hnathawktute an dinchhuah theih nan thlai leh thei chi hrang hrang, vulh leh khawi chite a tam thei ang ber thar an tum thu a sawi a, "Kan kalphung pangngai piah lama kan kal a, kan tihdanglam a ngai. Dinchhuah tuma ṭan la mek hna thawktute puihna turin ṭang puihna kan siam dawn," a ti.

Inkhawmah hian MPCC vice president Lal Thanzara leh treasurer Zodintluanga Ralte te pawhin thu an sawi a ni.