Ram neitu dik takte'n zangnadawmna an lak vat theih nan MJA-in DC sawipui

MJA, Kolasib district member-te chuan Kolasib district paltlanga national highway kawngpui zauh tura zangnadawmna vanga harsatna la awm mek chung­changah nimin khan Kolasib DC John LT Sanga a pisaah an kâwm a, ram neitu dik takte'n zangnadawmna la vat se an duh thu an thlen. DC chuan, mi 34 hnenah zangnadawmna pek a nih tawh thu a sawi.

Kolasib chanchinbumite chuan, kawngpui zauh turah ram neitu dik takte'n zangnadawmna la vat se an duh thu sawiin, hma la turin DC an ngen a ni.

MJA member-te chuan, Kolasib district-ah hmasawnna hna hrang hrang thawh a ni tawh ṭhin a, chu'ngah chuan dik lo taka sum lak tum an awm ṭhin thu sawiin, chu'ng mite chuan ram neitu dik takte harsatna an siam tawh ṭhin thu te, Kolasib district chauh ni lo, Mizo hnam ang pawha mualphona a thlen tawh ṭhin dan te, hnam tana mualphothlak tur thil awm tawh lo se an duh thute an sawi a ni.

Bawrhsap John LT Sanga chuan, sorkarin district tinah land acquisition khawih turin additional DC-te chu CALA atan a ruat vek thu sawiin, CALA hmalakna an enpui lutuk loh thu a sawi a, "Kolasib-ah pawh DC kan inrawlh loh chhan a ni," a ti.

John LT Sanga chuan, "Compensation pek chhuah turah hian CALA leh NHIDCL ten joint account-in sum an vawng a, mahni thua pek chhuah ngawt theih a ni lo," a ti a; zangnadawmna sem a nih loh chungchangah, harsatnate chu social media lamah a darh avangin chanchinbumite pawhin an hriat a rin thu a sawi.

Bawrhsap chuan, tun hnaiah GAD Secretary hoa meeting-ah buaina awm lohna hmunah chuan zangna­dawmna pek tura rèl a nih thu te, chumi bawhzui chuan buai nei lo mi 34-te account-ah pawisa an thun luh sak tawh thute a sawi a; "NHIDCL lam an fimkhur a, Roadside Reserve Forest leh Deemed Forest-ah plan­tation a awm lo ngei tih tihchianna mumal tak a awm loh chuan pawisa an pe chhuak ngam lo a ni," a ti.

Competent Authority for Land Acquisition (CALA) Lallawmawma, additional DC chuan, zangnadawmna an sem theih rih loh chhan chu court case kal lai a awm vang leh Land Revenue & Settlement department-in CALA hnenah lehkha a pek vang a nih thu a sawi. GAD hotute nena meeting thu angin, joint verification neih a nih thu a sawi bawk.