ZPM-in Siaha leh Palak bialah Candidate a neih dawn thu puang

ZPM, Siaha district president Pasa Azyu chuan nimin khan Siahaah thuthar thehdarhtute a kâwm a; ZPM-in hma an sawn zel chhan chu an fel vang ni loin, mipuiin MNF leh Congress an kham tawh vang leh ZPM policy ṭha an tih vang a nih thu a sawi.

Siaha district ZPM President chuan, Siaha district-a khaw tam takah ZPM zawm tum leh unit din duh an awm thu sawiin, "Sorkar hnathawk leh neutral te, kohhran mite hian ZPM an support hle niin kan hria. Nakkum MLA inthlan turah hian ZPM chu sorkar ngei tura rinkai ber niin a lang. Palak leh Siaha MLA bialah ZPM chuan candidate ṭha tak tak kan neih ve ve dawn," a ti a; ZPM thláwp turin Mara ram mipui a sáwm.

Pasa Azyu chuam, ZPM chu Siaha district bikah an la lian lo tih sawiin, "ZPM hi nakkum MLA inthlan hmain Siaha district-ah party hmasawn chak leh ṭhang duang tak a nih ngei kan ring a, mi ṭhahnem tak ZPM-a lawm luh tur kan nei. Hetiang boruak kan neih theih chhan hi kan fel vang a ni lo a, mipuite'n MNF leh Congress-te rei tak an hrawn tawh a, an kalphung an hre tawh a, an kham tawh hle avang leh ZPM policy 'Kalphung thar - mipui sorkar' siam tur an nih avangin ZPM lakah beiseina sang tak an nei a ni," a ti.