Cyber Jagrookta Diwas hman a ni

Lunglei SP Rex Zarzoliana Vanchhawng hoin nimin khan SP conference hall-ah computer leh internet hman chungchang inzirtirna ní, Cyber Jagrookta Diwas hman a ni. Mizoramah sum chungchanga inbumna a tam thu tarlan a ni.

Rex Zarzoliana Vanchhawng chuan, "Social media hman chungchangah kan fimkhur tâwk loh avangin inbumna a tam a, cyber hmanga bumna tâwkte hi a tlangpuiin lehkhathiam chinte an nih ṭhin avangin sorkar hnathawk leh lehkhathiamte hnenah cyber chungchang inzirtir a ngai," a ti.

Cyber crime chu hriat chian a pawimawh thu sawiin SP chuan, "Office hrang hranga computer khawihtute kan nih avangin kan in update a, mi dangin harsatna an tawh loh nan inhrilhfiah a ngai. Police-te hi hnu chhuitu kan nih angin cyber crime a awmin police-ah an thlen ṭhin a, thil zawng zawng chhui chhuak thei lo mah ila a chinchang hriat a ngai," a ti a; kal khawmte chu an thiamnate mi dang hnenah a zau thei ang bera hrilh turin a chah.

Police inspector Ramnunmawii tarlan danin, Mizoramah sum chungchanga inbumna a tam a, chumi laka inven nan bank account, one time password (OTP), bank chungchanga thil pawimawhte mi dang hrilh loh a ṭul. Online-a thil chahah fimkhur a ngai a, hursualna chungchanga thil post te, loan dilsak te, mahni hming loa sim card hmante leh finfiahna nei loa thil post hmasak nihte a pawi thu sawi a ni.