Inkhârkhip laiin tuialhthei hralh tlem Filling station-te'n tuialhthei an ngah

Mizorama inkhàrkhip chhungin Aizawla petrol pump/filling station hrang hrangte hawn ni mah se, mipui chhuah phal a nih loh avang leh chhuak thei tura sorkarin phalna a pek an tam loh avangin an inhralh ṭha lo; chutih rualin, tuialhthei an nei ngah a, dahna tur hmun ruak nei lo zawk hial pawh an awm.

Aizawla filling station hrang hrangte Vanglaini palaiin a biak­naah, pump neitute chuan inkhârkhip hma aia an inhralh tlem thu an sawi hlawm a; amaherawhchu, inkharkhip chu tihtawp pawh ni se, petrol leh diesel neih sa a tam rih avangin a thlaphànawm loh tih an sawi a ni.

Inkhàrkhip laia Aizawla pump zinga inhawng reng (ni khatah darkar 24) tura sorkarin a tih zinga mi MIZOFED petrol pump, Treasury Square chuan darkar 24 inhawng mah se, mipui an chhuah tam loh avang­in inkhàrkhip hmaa ni khata litre 4,000 vel an hralh ṭhin ang chu inkharkhip laiin ni thum/li velah an hralh zo thei chauh tih an sawi.

Zangena Filling Station, Ramhlun North chuan ni khatah inkhàrkhip hmaa an hralh ṭhin hmun 10-a ṭhena hmu li vel bâk inkharkhip laiin an hralh loh thu Vanglaini palai an hrilh.

Vanglaini palai zawhna an chhannaa a lan danin, Lalboi Filling Station, Hunthar Veng chuan inkharkhip laiin a hmaa an hralh aṭanga 10% vel bak an hralh lo. Lalbiak­liana Filling Station, Ramhlun Venglai pawhin inkhàrkhip hma chuan thla khatah tanker phur 40 vel an hralh thei a, inkhârkhip hnuah erawh chuan tanker phur 11 vel chauh an hralh ṭhin.

K Lalnghakliana Filling Station, Ngaizel chuan inkhàrkhip laiin nunphung pangngai hun laia diesel an hralh zat hmun lia ṭhena hmun khat vel an hralh a, petrol pawh an hralh ṭhin zatve vel chauh an hralh ṭhin. Singson Filling Station, Hunthar Veng chuan a hmaa ni khata litre 6,000 vel an hralh ṭhin chu inkharkhip lai chuan litre 1,000 velah hrût rual theih a nih thu an sawi.

Filling station hrang hrangte hian tuialhthei an nei ngah tlangpui a, ṭhenkhat chuan dahna tur hmun ruak an neih loh avangin an tanker-te chu petrol/diesel phurin an dintir rih. A ṭhen chuan inkhàrkhip zawh huna phai aṭanga lak a buaithlak palha inrin lâwk nan a theih anga tam lâk khâwl tumin ṭan an la mek a ni.