KHAWTHLIR

Member-ah ruat
Lok Sabha MP C Lalrosanga chu Parliamentary Standing Committee on Health and Family Welfare member-ah ruat a ni. Committee-ah hian Lok Sabha MP 31 leh Rajya Sabha MP 10 an tel. C Lalrosanga hi Parliamentary Standing Committee on Coal and Steel-ah member a lo ni tawh ṭhin a, DoNER ministry-a Parliamentary Consultative Committee member a ni mek bawk.

Thisen pe
Siaha leh Tipa-a IKK Ṭhalai Pawl member-te chuan October 5, Nilaini khan Siaha District Hospital tan thisen unit 31 an pe a, petute mipa 25 leh hmeichhia paruk an ni. MTP, Siaha Meisatla Branch pawhin District Hospital tan thisen unit 17 an pe a, petute mipa 14 leh hmeichhia paruk an ni.

Lehkhabu tlangzarh
Rev. H Killluaia lehkhabu, 'Sam thu ril hai chhuahna' volume 1-5 chu October 5, Nilaini khan BCM president thar tur Rev.Prof. R Zolawma'n Aijal Club-ah a tlangzarh. Lehkhabu hi Rev. H Killuaia lehkhabu 33-na a ni a, phek 2,477-a chhah a ni.

Australia senator
Chief minister Zoramthanga chuan nimin khan a pisaah Australia senator Dean Smith a kâwm. Chief Minister hi Planning Board vice chairman H Rammawi-in a ṭawi-awm a ni.

RTI Act zirho
Serchhip DC leh Lawngtlai DC-te chuan nimin khan Administrative Training Institute nen ṭanghoin RTI Act khawihtu - state public information officer, state assistant public information officer leh department appelate authority-te tan Right to Information Acts, 2005 leh Online RTI chungchang zirhona an buatsaih.

Diamond jubilee
Mizoram Ex-Service Leaque sub head- quarters, Champhai chuan nimin khan Kahrawt community hall-ah an kum 60 tlin an lawm a, district bawrhsap James Lalrinchhana'n a hmanpui. Bawrhsap hian jubilee lawmpui nan Rs 5,000 leh tarpauline a pe. MESL hi Champhaiah October 6, 1960 khan Champhai Ex-Service Association tia din a ni.