Minority tana duan PMJVK sport atana hmang hnem ber Mizoram ; State dangin zirna leh hriselna lam an uar

Mizoram sorkar chu India rama state zingah Pradhan Mantri Jan Vikas Karyakram (PMJVK)-a sport project ngah ber a ni. State dangte chuan zirna (education) leh hriselna (health) lamah project an ngah thung.

PMJVK hi Ministry of Tribal Affairs hnuaia awm niin Centrally Sponsored Scheme a ni. Ministry of Tribal Aff airs tarlan danin, kum 2020-21 khan PMJVK hnuaiah Mizoram tan project 70 pawm a ni a, chung zinga 63 chu sport project a ni.

Sports project ni lo project dang pasarih a awm a; chu'ngte chu - common service centre project pathum leh hostel project pali a ni. Mizoram chu India ram state zingah PMJVK hnuaia sport project ngah ber a ni.Kum 2020-21 chhung hian PMJVK hnuaiah state 15 tan project pawm a ni a, Mizoram tih lohah chuan Arunachal Pradesh chiahin sport project an nei. Arunachal Pradesh hi project 25 pawmsak an ni a, chung zinga pahnih chu sport project a ni. State dang zawng chuan PMJVK-ah sport project an nei lo.

India hmarchhak state zingah Sikkim-in project nei tam berin, project 537 an nei a; chungte chu - teaching aid project 520, school building project 12, common sevice centre project pathum leh, culture centre leh hostel project pakhat ve ve a ni.

Sikkim dawta project nei tam ber Manipur chu project 81 pawmsak an ni a; an project-te chu - health project 67, hostel project 12 leh degree college additional infrastructure pahnih a ni. PMJVK-in project a pawmsak state 15 zinga project pawmsak tam ber chu West Bengal a ni a, project 3,506 pawmsak an ni. West Bengal project-te chu - toilet project 1,975, drinking water facility project 1,087 leh additional classroom project 444 a ni.

PMJVK CHU ENG NGE A NIH?
PMJVK hi Ministry of Minority Aff airs hnuaia Centrally Sponsored Scheme a ni a, 2008-09 khan bul ṭan niin a tirah chuan minority-te chen tamna district 90-ah bul ṭan a ni a; 2017-18 khan a kalpuina hmun hi ennawn niin state leh UT 33-a minority-te chenna district chauh ni loin district headquarters 109, block 870 leh town 321-ahte kalpui a ni.

NITI Aayog-in a zir chian hnuah 2025-26 thlenga kalpui dan tur duan chhunzawm a ni a, a huam chhunga mipui nunphung leh ei leh bar dinhmun (socio-economic condition) chawikanna atana hman tura tih a ni. PMJVK hmang hian mipui nawlpui nun chawisan (improving quality of life of the people) a, midangte nena hmasawnna inthlau lutuk tur veng tura duan a ni. PMJVK hi a tirah chuan education, health, skill development leh hmeichhe chawikanna atana hman tur chauha duan a ni a, ennawn a nih hnua a hman theihna dang duan tharte chu - sports, sanitation, solar energy, drinking water project-te an ni.
(Thu lakna - https://minorityaff airs.gov.in)