Mizoramah lungalhthei la zawng ṭan thei lo

Mizorama lungalhthei (coal) zawnna tura Mizoram sorkarin May 2022-a sorkar laipuia Central Mine Planning & Design Institute Ltd (CMPDIL) hnena tender chhuah dilna a thlen chu pawm a la ni lo a, hei vang hian Mizoramah lungalhthei zawn hna tawh theih a la ni lo.

Vanglaini palai zawhna chhangin Geology & Mining hotute chuan, December 2021 khan CMPDIL hnenah tender terms & condition an thawn tawh thu an sawi a, "Kan hmu lo an tih avangin email leh hard copy-in kumin May thla khan kan thawn nawn leh a, tun thlengin approval min la pe rih lo," an ti.

Geology & Mining hotute chuan, September 10, 2022-a Hyderabad-a National Mines Ministers' Conference-ah Commerce & Industries minister Dr R Lalthangliana'n sorkar laipui hotute tender chhuah dilna thlen thawh chungchang a bawhzui tih an sawi.

Lungalhthei zawnna tura tender chhuah phalna an neih hunah Mizorama lungalhthei zawngtu tur zawn a nih dawn thu te, an zirchian hnuah laih chhuah tur khawpa tam a awm chuan lungalhthei lai chhuaktu tur zawnna auction neih leh tur a la nih thute an sawi bawk.

Dr R Lalthangliana'n National Mines Ministers' Conference-a a sawi danin, Mizorama hmun pahnih - Mamit district-a Thinghlun ram sq.km 33-a zauah leh Lunglei district-a West Rotlang ram sq.km. 48-a zauah lungalhthei zawn tum a ni.

Lungalhthei zawn hna chu company-te thawh tur niin, sum sèn ngai zawng zawng sorkar laipui tum tur a ni a; Mizoram sorkara Directorate of Geology & Mining leh Commerce & Industries department chu nodal department an ni ang a, logistic support ngai zawng zawng an buaipui dawn a ni.