Governor leh Autralian senator-in Myanmar ráltlân chungchang sawi dun

Governor Hari Babu Kambhampati leh Australian senator Dean Smith chu nimin khan Raj Bhavan-ah an inkâwm a, Mizoram dinhmun leh hmalaknate leh Myanmar ráltlânte chung­chang an sawi dun.

Inkawmnaah hian, India leh Australia inlaichìnnain tun hnaiah nasa taka hma a sawn thu an sawi a; insumdawn tawnna leh thil hrang hrangah an inṭhian ṭhatna tihngheh mek zel a nih thu an sawi.

Dean Smith chuan, Mizoram a tlawh chhan pa­khat chu - Myanmar ráltlân­te chungchang a nih thu ­sawiin, Mizoram sorkarin raltlante a ngaihsak dan leh hma a lak dante a zawt a ni.

Governor chuan, Mizoram hmun hrang hrang­ah Myanmar raltlan an lut tih sawiin, mihring mihrinna aṭangin dan emaw, khap emaw theih an ni lo tih a sawi a; ráltlân tam tak chu Myanmar Chin state-a Zo hnahthalakte an nih thu sawiin, "Mizoram mipuite'n ṭha takin an chhawmdawl a, sorkar pawhin ṭul bikah chuan hma a la ṭhin," a ti.

Dean Smith chuan, Mizote leh Chin state-a chengte chu unau an ni tih a hriat tawh thu sawiin, Australia-ah pawh Chin mit tam tak an awm mek thu leh Australia sorkarin a ngaihsak thu a sawi a; India chu Australia ṭhian ṭha a nih angin Myanmar ráltlante ṭha taka lo enkawl turin Mizoram a ngen a ni.