Governor-in RTI Week a hawng

Nimin khan Right to Infor­mation (RTI) Week 2022 ṭan a ni a, Governor Dr Hari Babu Kambhampati-a'n Assembly Annexe conference hall-ah a hawng. Larsap chuan, sorkar khalh ngîlna atan mipuiin phûr takin RTI Act hmang zel se a duh thu a sawi.

Governor chuan, Mizoram Information Commission (MIC) leh a thawhpui General Administration leh Information and Commu­nication Technology department-te inpekna zara Online RTI Application hman a ni ta chu hmasawnna a nih thu a sawi a, "Online RTI hian office pan harsat deuhte tan awlsamna a siam mek a, sum leh pai bakah, hun hlu tak, information dilna atana sên ngai ṭhin a tiziaawm sawt a ni," a ti.

RTI Act chu sorkar khalh ngìlna atan khua leh tuite'n phûr takin hmang zel se a duh thu sawiin Larsap chuan, "MIC lam pawhin hna ṭha taka an thawh chhunzawm zel a pawimawh," a ti a; RTI Act chungchang uar leh zuala mipui zirtir a pawimawh thu a sawi.

Dr Hari Babu Kambham­pati chuan, RTI Act ṭangkaina a sawi rualin, hman sual a nih theih thu a sawi a, "A ṭha lo zawng leh mimal inbeihna atana hman loh chungchangah mipui leh RTI hmangtute'n mawh an phur a ni," a ti.

Chief information commissioner Lalnun­mawia Chuaungo chuan, Department Appellate Authority, State Public Information Officer leh State Assistant Public Information Officer-te ṭan la chhunzawm turin a fuih a; Online RTI-a inziak lut lote pawh a rang lama inziak lut turin a chah.
Lalnunmawia Chuaungo chuan, RTI Act-a suo motu disclo­sure-in a phût angin, department tinin website an neih a ṭul thu leh website-ah mipui hriat tur thilte RTI Act hmanga zawh chhuah kher ngai loa tarlan vek tur a nih thu a sawi a, "Hei hi department tam zawkin an zâwm tawh a, la tarlang lote pawh tarlang thuai tura hriattir an ni," a ti.

RTI Week hawnna inkhawmah hian RTI Week puala college zirlaite tana auhla inphuahsiak (slogan writing compe­tition) buatsaiha ti ṭhate hnenah lawmman hlan a ni a; pakhatna Zomuanpuia Khiangte (Hrangbana College), pahnihna Vanlalhriatpuia (Pachhunga University College) leh pathumna Lalchhandama (PUC)-te an ni.