MHSSP leh MzSRLM-in MoU an ziak

Mizoram Health System Strengthening Project (MHSSP)-a Component-II Kolasib district-a kalpuina atan MHSSP leh Mizoram State Rural Livelihoods Mission (MzSRLM)-te chuan October 6, 2022 khan thawh dunna thuthlung, memorandum of understanding an ziak.

Thawhhona thuthlung hi kum khat atan ziah a ni a; MzSRLM aiawhin MzSRLM state mission director leh Rural Development secretary R Zarzosanga'n hming a ziak a, MHSSP aiawhin project director Dr Eric Zomawia'n hming a ziak.

Thawh dunnain a tum ber chu - Kolasib district-a MzSRLM hnuaia self help group-te kaltlanga MHSSP component pahnih hnuaia hmalakna kalpui a ni a; health insurance enrollment tam thei ang ber nei tura hmalakna leh non-communicable disease (natna inkai chhâwn theih loh) chungchang zau zawka inzirtirte a huam.

Dr Eric Zomawia chuan, MHSSP chu World Bank sum hmanga hmalakna a nih thu sawiin, health insurance pawimawhna inzirtirna te, cancer, zunthlum, thisen sang, lung lam natna leh áwmna benvawn (chronic obstructive pulmonary disease) chungchang inzirtirna a huam ang.