Mizoramah mammal chi 84 a awm

National Wildlife Week vawi 68-na pualin nimin khan Chief Wildlife Warden pisa conference hall-ah inràwnkhawmna, Consultative Meeting buatsaih a ni a, Mizoramah ramsa ke pali nei, hnute tuia no châwm chi (mammal) chi hrang 84 a awm tih tarlan a ni.

Consultative Meeting-ah hian sorkar official te, kohhran leh tlawmngai pawl aiawhte leh thuthar thehdarhtute an tel a, principal chief conservator of forest RK Singh-a'n a hmanpui. Thupui chu 'Nungcha leh ramngaw humhalh' tih a ni a, Liankima Lailung, IFS (Rtd)-in a kaihruai.

Lawngtlai DCF Laltlanhlua Zathang chuan, nungchate chênna hmun aṭanga chhûtin Mizoram awmna chu hmun fuh leh ṭha a nih thu a sawi a, "India ramah ramsa ke pali nei, hnute tuia no châwm chi (mammal) chi hrang 350 a awm a, chu'ng zinga 84 chu Mizoramah a awm thu Zoological Survey of India (ZSI)-in a tarlang," a ti a; EFCC department-in Mizoramah mammal chi 110 a awm nia an hriat thu a sawi bawk.

Laltlanhlua Zathang tarlan danin, Mizoramah mammals - záwng chi riat, sahel ei chi (carnivores) chi riat leh small carnivores chi 16, ui lam chi (canids) chi hnih, savawm chi hnih, hnim hnah ei (herbivores) chi sarih, lei chhunga awm chi (fossoreal) chi riat leh thinga awm chi (arboreals) chi 11 a awm. Mizorama nungchate chu mang mai hlauhawm (endangered species) anga ngaih deuh vek an ni.

Central Zoo Authority (CZA)-in sahuan a pawm hoah chiah ramsa khàwi phal a ni a, hmun danga ramsa khàwi, vulh leh kawl chu danin a phal lo a ni.

Inràwnkhawmnaah hian Laltlanhlua Zathang-in ‘Mizorama nungchate dinhmun’ tih thupui a sawi a; Aizawl Theological College-a dean Rev.Dr LH Rawsea'n 'Thilsiam dangte nena Pathian biakho' tih thupui sawiin, Centre for Environment Protection coordination AC Zonunmawia'n 'Role of media and NGOs in wildlife conservation' tih thupui a sawi.

Inràwnkhawmnaa telte'n ramngaw, leilung leh a chhunga nungchate humhalh dan tura an ngaihdante an sawi a; nungcha leh ramngaw humhalh kawngah sorkar, kohhran, pawl leh media-te thawhho zel ni se, an ti.

Rawtna an siamte leh hmalak zel dan tur an sawite chu Environment, Forest and Climate Change department hotute chuan sorkar thuneitute hnenah thlen an tum thu an sawi a ni.