Teirei peih leh tawrhchhel a ngai - Dr R Lalthangliana

Women’s Polytechnic, Aizawl chuan nimin khan an college-ah zirlai tharte lawmna an buatsaih a; khuallian Higher & Technical Education (HTE) minister Dr R Lalthangliana chuan, hlawhtlinna chang turin teirei peih leh tawrhchhel a ngaih thu a sawi.

Dr R Lalthangliana chuan, zirlaite chu certificate nei tur chauha zir lo a, thiamna tak tak nei tura zir turin a fuih a, "Tunlaiah eizawnna kawng hrang hrang a tam tawh. Sorkar hna dil ngai loin hna leh kawng tharte hi private sector bakah, mahnia eizawnna, self employment lamah a tam tawh. Mahse, teirei peih leh tuarchhel nih a ngai," a ti.

Women’s Polytechnic chu zirna-in danglam bik leh pawimawh a nih thu sawiin Minister chuan, "Course pali a kalpui hi Mizoram hmun dangah zirna a awm ve lo," a ti a; an course-te chu hna zawn nan leh thiamna bik neihna lam a nih avangin an zir zawh rualin hna an hmu awlsam bika a ngaih thu a sawi.

Women’s Polytechnic hi kum 1998-a din a ni a, course pali - Modern Office Management & Practice, Garment Technology, Electronics & Telecommunications leh Beauty Culture & Cosmetology-te a awm a, kum thum chhung zir vek a ni. Zirlai 227, zirtirtu 27 leh thawktu dang 31 an awm mek.