Tribal-te'n zalenna an sual dan zirho a ni

National Commission for Scheduled Tribes leh Mizoram University-te chuan, nimin khan 'Contribution of Tribal Heroes in Freedom Struggle' tih thupui hmangin exhibition an buatsaih a, Social Welfare & Tribal Affairs minister Dr K Beichhua'n a hawng.

Dr K Beichhua chuan, lalnu Ropuiliani'n British awpbehna duh loa Mizoram tana a nun a hlan hriatrengna atan Kelsihah Ropuiliani Museum din tum a ni a, cheng nuai 1,800 séngin sak mek a ni thu leh, Ministry of Tribal Affairs aṭanga sum hmuh nuai 2,300 vel hmangin Kelsihah vêk Tribal Research Institute sak a nih thu a sawi.

India ramin tun dinhmun a thlen theih chhan leh ram ropui a nih chhan chu zalenna sualtute vang a ni tih sawiin K Beichhua chuan, "Hmasang aṭangin tlang rama cheng tribal hnamte'n kal dan bik leh eizawn dan bik an lo nei tawh ṭhin. India rama tribal zingah Santhal Rebellion, Khasi Rebellion, Naga Movement leh a dangte chu history-a lang reng tur a ni," a ti a; India ram chu hnam hrang hrang insuihkhawmna a nih avangin inlungrualna leh inremna awm zel se a duh thu a sawi bawk.

Inkhawmah hian India rama British sorkarin tribal chunga hma an lak dan hrang hrangte Akhil Bhartiya Vanvasi Kalyan Ashram aṭanga tel Kedar A Kulkarni-in a sawi a; Prof. Lalngurliana'n Ropuiliani leh a pasal Vandula Sailo leh a fapa Lalthuama chanchin a sawi.

Kalkhama leh Lianphunga te unau chanchin leh Changri Valley an rûn dan te, Vailian Vawi Hnihna (1888-1889) chungchang te, Fanai lal Zakapa leh CS Murray chanchin te, Mizo lalte'n British an do lêt dante ngaihthlak a ni bawk.