Hripui vei enkawl lai mi 91 an awm

October 6, Ningani khan Mizoramah Covid-19 vei mi 13 hmuh chhuah a ni a, nimin khan hripui vei dam tawh mi 10 chhuahtir niin, hripui vanga thi an awm lo. Nimin tlai khan hripui vei enkawl lai mi 91 an awm.

IDSP aṭanga thu dawn danin, Ningania district hrang hranga Covid-19 positive hmuh zat chu - Aizawl district-ah mi pasarih, Serchhip district-ah mi panga leh Siaha district-ah mi pakhat a ni a; swab sample 170 endik aṭanga positive rate chu 7.65% a ni.

Mizoramah swab sample 19,84,123 endik tawh niin, Covid-19 vei 2,38,547 hmuh chhuah a ni tawh a, 12.02% a ni. Nimin tlai dar 5 thlengin mi 2,37,733 (99.66%) chhuahtir an ni tawh a, mi 723 (0.30%) thi tawhin, enkawl mek mi 91 (0.04%) an awm.

Nimin tlai dinhmun angin, Kolasib leh Lawngtlai district-ah Covid-19 vei enkawl lai an awm tawh rih lo a; active case 10 aia tamna district pathum - Aizawl, Mamit leh Khawzawl district-te chiah a awm tawh a ni.