KHAWTHLIR

Thakthing Veng Local Task Force chuan nimin khan Lungleng-I khawtlang hnenah Rs. 40,000, buhfai ip 10 leh purûn ip 4 an pe. Saichal V/C pawhin tun hnai khan ramri vengtute ṭanpui nan Ngopa SDO(C) hnenah Rs. 26,000 an pe bawk. Covid-19 dona leh invennaa hmalaknaah task force, YMA branch leh khawtlang anga 

ṭanpuina inpê tam tak an awm tawh a, an la inpe mek zel bawk a ni.

Covid-19 donaa hmalakna atan nimin chawhnu dar 3 thleng khan mi/pawl pathumin Chief Minister's Relief Fund-ah 1,71,050 an thawh. May 6, Nilaini khan mi/pawl palite'n Rs. 1,47,000 an chhûng

lut bawk.

Kawlbem leh Ngopaa awm 46th Assam Rifles chuan nimin khan an huam chhunga task force-te hnenah ei leh in turte leh thosi hlo an hlân. Assam Rifles hian ramria khaw hrang hrang­ah ṭanpuina an lo hlan tawh ṭhin a ni.

Aizawl District Magistrate chuan, sorkarin bawlhhlawh leh leivûng paihna tur hmun a siam ni loah paih khap tlat a nih thu nimin khan a puang. Hei hi lui tui, nungcha leh ramngaw humhalhna tura ruahman a ni a, thupek hian thla hnih chhung a huam ang. Thupek zâwm lote chu IPC Section 188 hmanga hrem theih a ni.

Malsawmkimi (30) d/o LH Lianzuali, Hnahthial Electric Veng chu nimin chhun dar 12:30 vel khan Tuichang luiah a tla hlum. Hnahthial aṭanga 

thu dawn danin, Malsawmkimi hi a laizawn leh a ṭhiante pahnih nen Tuichâng luiah an kal a, luia balu lakna JCB-in a laih khuarah a ṭhiante pahnih nen an tla a, mi dang pahnih chhanchhuah hman an nih laiin, Malsawmkimi hi an chhanchhuak ve hman ta lo a ni.

Hnahthial DC Vanlalmawia chuan May 6 khan KVK, Hnahthial Demonstration Farm a tlawh a, changpât hmanga leiṭha siam (vermicomposting) an kalpui mekte a enfiah bakah, Hnahthiala bawlhhlawh ṭawih theite mumal taka sawngbawl dan tur an sawiho. DC hian KVK-in dragon fruit, azolla leh lakhuihthei an chìnna hmun leh ar an vulh leh keutirna hmunte a tlawh bawk.