State páwna Mizo zirlaite'n vote an thlak theih nan MSU-in hmalak an rél

Mizo Students' Union (MSU) chuan October 6, Ningani khan Vanapa Hall-ah General Conference vawi 20-na an hmang a, minister of state Robert Romawia Royte-in a hmanpui. MSU chuan, inthlanpuiah Mizoram páwna awm Mizo zirlaite'n vote an thlak theih nan hmalak an rél.

MSU chuan an inkhawmpui lian rorelnaah, "MLA general election-ah Mizo zirlai, state páwna awmte'n vote an thlak theih nan MSU-in hma la rawh se," an ti a; Election Commission of India leh Mizoram sorkarah thlen an rél a ni.

MSU chuan, 8th Schedule-ah Mizo ṭawng dah a nih theih nana hmalak an rél a; "Sorkar college admission fee aṭanga sorkarin revenue a lak ṭhin hi tihtawp a nih theih nan hmalak ni rawh se," an ti bawk. Mizorama public sector undertaking hnuaia hna laknaah State Language Proficiency Test Board din a nih theih nan hmalak an rel bawk.

Kum 2022-2024 chhunga MSU office bearer turte an thlang a, president atan Samuel Zoramthanpuia thlan a ni.