Cong-in mi thar ṭhahnem tak làwm lut

Mizoram Pradesh Congress Committee (MPCC) chuan thuchhuah siamin, an party hruaitute'n district tin tlawh chhuah hun an hman - October 4, 2022 aṭanga khawchhak tlangdung an fanna chu nimin khan an zo a, Congress party-ah voter 769 an lawm lut niin an tarlang.

MPCC tarlan danin, khawchhak tlangdung fannaah hian MPCC elected office bearer pathum - president Lalsawta, vice president Lal Thanzara leh treasurer Zodintluanga Ralte bakah, Aizawl aṭangin party hruaitu mi 60 vel an tel tluan a; Saitual district, Khawzawl district leh Champhai district-te tlawhin, vantlang inkhawm an buatsaih ṭhin a ni.

Khawchhak tlang-dung fannaah hian Cong-ress party mipui an kai tho nasa hle nia sawiin MPCC chuan, "Congress party-in Manifesto no. 1 a release tâk pawh uar taka puanzara zirho nghal zel a ni a, he programme hmang hian Mizoram mipui tam takin Congress party-ah beiseina thar an neih ngei kan beisei," an ti.

Congress party chuan, an president ṭhin Lal Thanhawla a chawlh hnua MPCC OB tharte'n Mizorama district 11 an tlawh chhuak tawh tih sawiin, Pathian awmpuina an dawn avangin an lawm thu an tarlang a; chutih rualin, Saituala hun an hmannaa tel ADCC organiser Lalrinawma, Armed Veng, lirthei chetsualnaa a thi chu pawi an tih thu leh an ui thu leh, mi dang hliamte ṭha chhuak leh thuai tura an duhsak thu an sawi bawk.